Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 151 Hüküm no: 58 Orijinal metin no: [6a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un boşandığı kocası İsmail’in mehir bedelinden kalan alacağının taksitler halinde ödenmesi Ma‘rûz Medîne-i Üsküdar’da Solaksinan mahallesinde sâkine mu‘arrefetü’z-zât Fatıma bt. Mustafa nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı İsmail b. Ali muvâcehesinde ben mezbûr İsmail’in yetmiş guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan altı [gün] mukaddem beni tatlîk etmekle zimmetinde mütekarrir ve ma‘kūdün-aleyh olan mârrü’z-zikr yetmiş guruş mehr-i müeccel hakkımı mezbûr İsmail’den taleb ederim deyü da‘vâ ol dahi cevâbında fi’l-hakīka müdde‘iye-i mezbûre Fatıma Hatun yetmiş guruş mehr-i müeccel tesmiyesiyle zevce-i medhûlün-bihâsı olduğunu ve târih-i mezbûrda tatlîkini ikrâr edip lâkin müdde‘iye-i mezbûre târih-i merkūmda sâlifü’z-zikr yetmiş guruş mehr-i müeccelinin yirmi guruşundan benim zimmetimi ibrâ edip ve sekiz buçuk guruşunu dahi yedine def‘ ü teslîm eylediğimde ol dahi yedimden ba‘de’l-ahz ve’l-kabz zimmetimde ancak kırk bir buçuk guruş deynim bâkī kalmışdır deyü ba‘de’d-def‘ mezbûre Fatıma Hatun cevâbında sekiz buçuk guruş ahzını ikrâr lâkin yirmi guruşdan ibrâ ettiğini inkâr etmeğin mezbûr İsmail def‘-i mezkûrunu isbâtdan ızhâr-ı acz edip talebiyle müdde‘iye-i mezbûre Fatıma Hatun ba‘de’t-tahlîfi’ş-şer‘î mûcebiyle meblağ-ı mehr-i merkūm altmış bir buçuk guruşun müdde‘iye-i mezbûreye edâsıyla mezbûr İsmail ba‘de’l-ilzâm mezbûr İsmail meblağ-ı mehr-i merkūm altmış bir buçuk guruşu hâlâ def‘aten edâya iktidârı olmayıp tecîl ve taksîte tâlib olmağla müdde‘iye-i mezbûre Fatıma Hatun’a işbu târih-i i‘lâmdan beher şehr tamamında beşer guruş verip ol-vechile meblağ-ı mehr-i merkūm altmış bir buçuk guruşu on iki ay ve on gün tamamında edâ ve teslîm etmek üzere mezbûr İsmail’i müdde‘iye rızâsıyla tecîl ve taksît eylediğinde ol dahi ecel-i merkūmu kabûl ve ber-vech-i muharrer müeccelen ve mukāssatan edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 13 min-C sene 1204