Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 152 Hüküm no: 60 Orijinal metin no: [6a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fatma’nın Hanparsum ile oğullarından kalan alacağının ödenmesi için tenbih Ma‘rûz Medîne-i Üsküdar’da Davudpaşa mahallesi sâkinelerinden arzuhâlde ismi mezkûr mu‘arrefetü’z-zât Şerife Fatıma bt. Mustafa nâm hatun Çarşamba günü Dîvân-ı âlî’de ba‘dehû Üsküdar mahkemesinde meclis-i şer‘-i hatîrde arzuhâl eden Hanparsum v. Daksir nâm zimmî muvâcehesinde bin iki yüz üç senesi Muharrem’i gurresinde merkūm Hanparsum zimmî ile gāibân ani’l-meclis sulbî kebîr oğulları Tatos ve Kirkor nâm zimmîler ma‘an mâlımdan ve yedimden dört yüz kırk sekiz guruş iktirâz ve kabz ve herbiri âharın zimmetine lâzım gelen meblağa kefîl ve dâmin olup hattâ gāibân-ı merkūmân târih-i merkūm ile müverrah bir kıt‘a deyn temessüğü dahi yedime i‘tâ etmekle asâlet ve kefâletine binâen meblağ-ı merkūm dört yüz kırk sekiz guruşu merkūm Hanparsum zimmîden taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını adâletleri zâhir olan Terzi el-Hâc Mahmud b. Ahmed ve Mehmed Halîfe b. Hasan nâm kimesneler şehâdetleriyle muvâcehesinde vech-i şer‘î üzere isbât etmeğin mûcebiyle meblağ-ı merkūm dört yüz kırk sekiz guruşu asâleten ve kefâleten müdde‘iye-i mezbûre Şerife Fatıma’ya edâ ve teslîme merkūm Hanparsum zimmîye şer‘an tenbîh olunduğu mübâşiri Ali Çavuş kulları iltimâsıyla huzûr-ı âlîlerine i‘lâm olundu. Fî 18 min-C sene 1204