Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 153 Hüküm no: 62 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Ağnat’ın Salih b. Numan’daki alacağını kefili olan eniştesi Şeyh Hacı Mehmed Emin Efendi’den tahsil edip rehin olan gümüş diviti iade ettiği Ma‘rûz Medîne-i Üsküdar’da Hasanağa mahallesinde İbâdiye Hamamı karşısında Bakkāl Ağnat v. Yani nâm zimmî medîne-i mezbûrede mahfil-i bâbda meclis-i şer‘-i hatîrde eş-Şeyh el-Hâc Mehmed Emin Efendi b. el-Hâc Hasan nâm kimesne mahzarında mezbûr eş-Şeyh el-Hâc Mehmed Emin Efendi’nin kaynı gāib ani’l-meclis Salih b. Numan nâm kimesne zimmetinde ecnâs-ı zehâir semeninden yetmiş beş guruş hakkıma mezbûr eş-Şeyh el-Hâc Mehmed Emin Efendi bi’l-emr ve’l-kabûl kefîl ve dâmin olmağla kefâletine binâen meblağ-ı merkūm yetmiş beş guruşu mezbûr eş-Şeyh el-Hâc Mehmed Emin Efendi’den taleb ederim deyü da‘vâ ol dahi cevâbında fi’l-hakīka müdde‘î-i merkūmun gāib-i mezbûr zimmetinde olan yetmiş beş guruş hakkına ber-vech-i muharrer kefîl ve dâmin olduğunu bi-tav‘ihi ikrâr ü i‘tirâf edip meblağ-ı merkūm yetmiş beş guruşu kefâleti hasebiyle müdde‘î-i merkūma işbu meclis-i şer‘de edâ ve teslîm eylediğimde ol dahi yedinden ahz ü istifâ ve meblağ-ı merkūm mukābelesinde gāib-i mezbûrun kendiye rehn vaz‘ ü teslîm eylediği bir aded sîm devâtını kefîl-i mezbûr eş-Şeyh el-Hâc Mehmed Emin Efendi’ye teslîm edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 8 min-C sene 1204