Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 154 Hüküm no: 63 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Mehmed’in, Seyyid Mehmed’de olan alacağının ödenmesi için kefili olan oğlu Seyyid Hüseyin’e tenbihte bulunulduğu Ma‘rûz Medîne-i Üsküdar’da Selami mahallesinde sâkin Duhânî Mehmed b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde es-Seyyid Hüseyin b. es-Seyyid Mehmed mahzarında mezbûr es-Seyyid Hüseyin’in babası mezbûr es-Seyyid Mehmed b. Mustafa nâm kimesne târih-i i‘lâmdan üç sene mukaddem yedimden istidâne ve kabz ve umûruna sarfla istihlâk eylediği cihet-i karzdan yüz yirmi guruş hakkıma tarafeynden bi’l-emr ve’l-kabûl işbu mezbûr es-Seyyid Hüseyin kefîl ve dâmin olmağla kefâletine binâen taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını lede’t-tezkiye adâletleri zâhir olan Mustafa b. Cafer ve es-Seyyid Emrullah b. Feyzullah nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle meblağ-ı merkūm yüz yirmi guruşu müdde‘î-i mezbûra bi-hükmi’l-kefâle edâ ve teslîme mezbûr es-Seyyid Hüseyin’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 23 min-C sene 1204