Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 154 Hüküm no: 64 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davit v. Mardıros’un, amcası Matos’un terekesinden olup hanımı Maryem bt. Haçador’un idaresindeki kahve ve tütün dükkânlarındaki âletlerin babası Mardıros’un olduğu iddiasıyla açtığı davanın reddedildiği Ma‘rûz Medîne-i Üsküdar’da Selami mahallesinde mütemekkin iken bir sene mukaddem hâlik olan Mardıros v. Davit nâm zimmî verese-i münhasırasından kebîr oğlu Davit nâm zimmî medîne-i mezbûrede mahfil-i bâbda meclis-i şer‘-i hatîrde hâlik-i merkūmun li-ebeveyn karındaşı olup ba‘dehû hâlik olan Matos v. el-merkūm Davit zimmînin zevce-i metrûkesi ve evlâ[d]-ı sıgārının vasîyy-i mansûbesi ve zikri âtî gedik âlâtına vâzı‘atü’l-yed olan şahsı mu‘arrefe Maryem bt. Haçador nâm Nasrâniye muvâcehesinde hâlik-i merkūm Matos zimmînin ile’l-helâk taht-ı tasarrufunda olan mahalle-i mezbûrede vâki‘ lede’l-ahâli ve’l-cîrân ma‘lûmü’l-hudûd bir bâb vakıf menzili tahtında kâin bir bâb kahve ve duhânî [dükkânı] derûnunda mevcûd beyne’l-esnâf gedik ta‘bîr olunur âlât-ı lâzıme-i ma‘lûme târih-i i‘lâmdan yirmi iki sene mukaddem babam hâlik-i merkūm Mardıros zimmînin yedinde mülkü iken karındaşı hâlik-i merkūm Matos zimmîye îcâr edip ol dahi âlât-ı mezkûreye mutasarrıf olmuş idi lâkin babam hâlik-i merkūm Mardıros zimmî hâl-i hayatında âlât-ı mezkûreye vaz‘-ı yed etmeyip ba‘de’l-helâk bana mevrûs olmağla âlât-ı mezkûreyi vasîyy-i merkūmeden taleb ederim deyü da‘vâ ve vasîyy-i merkūme cevâbında dükkân-ı mezkûr târih-i merkūmda harâb kahve dükkânı olup âlâtı ve gediği olmayıp zevcim merkūm Matos zimmî dükkân-ı mezkûru bâ-ma‘rifet-i mütevellî mutasarrıfından tefevvüz ve müceddeden üzerine bir menzil ve tahtına bir bâb kahve ve duhânî dükkânı ve bâ-fermân-ı âlî duhânî esnâfının nizâm-ı cedîdine dâhil ve Başmuhâsebe’ye kayd ve helâki târihine gelince yirmi iki sene karındaşı hâlik-i merkūm Mardi[r]os zimmî muvâcehesinde bilâ-nizâ‘ mutasarrıf olduğunu medîne-i mezbûre ve mahalle-i merkūme ahâlilerinden tevâtüren isbât ederim dedikde kizb üzerine tevâti’leri mutasavver olmayan medîne-i mezbûre ahâlisinden mahalle-i mezbûre mütemekkinlerinden İsmail b. Abdullah ve Mustafa Efendi b. Mehmed ve Süleyman Ağa b. Hasan ve Hafız es-Seyyid Mustafa Efendi b. es-Seyyid Mehmed ve Mustafa b. İsmail ve Osman Beşe b. Hüseyin ve el-Hâc Ahmed ve es-Seyyid Mustafa b. Hüseyin ve Memiş b. Mustafa ve Bedros v. Gragos ve İstefan v. Mardıros ve Bedros v. Minas ve Mikâil v. Begos ve Manuk v. Melkon ve Vartan v. Bedros ve İstefan v. Mardıros ve Manuk v. Mardıros ve Davit v. Haçador ve Karabet v. Ağya nâm cemm-i gafîr kimesneler bi’ş-şöhret ve’t-tevâtür şehâdet etmeğin mûcebiyle şöhret-i şâyi‘anın hilâfına ikāmet olunan beyyine makbûle olmamağla müdde‘î-i merkūm Davit zimmî da‘vâ-yı mezkûresiyle vasîyy-i merkūme Maryem Nasrâniyeye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 12 min-C sene 1204