Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 155 Hüküm no: 65 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in mehir eşyasını boşandığı eşi Ahmed Efendi’nin on gün içinde iade edeceği Ma‘rûz Mahmiye-i İslâmbol’da Kumkapı kurbünde sâkine Rukiye bt. Mehmed nâm hatun tarafından ber-vech-i âtî vekîl olduğu zâtını ârifân es-Seyyid Mustafa b. Hasan ve Memiş b. Mustafa nâm kimesneler şehâdetleriyle sâbit olan vâlidesi mu‘arrefetü’z-zât Emine bt. Salih nâm hatun medîne-i Üsküdar’da mahfil-i bâbda meclis-i şer‘-i hatîrde müvekkile-i mezbûrenin zevci Ahmed Efendi b. Mehmed Emin Efendi mahzarında mezbûr Ahmed Efendi zimmetinde kızım müvekkile-i mezbûrenin mehr-i mu‘accel eşyâsından bâkī kalan bir orta keçesi ve üç çuka mak‘ad ve bir kapı perdesi ve bir ocak yaşmağı ve bir seccâde ve iki yorgan ve bir top kırmızı şiltelik bez ve bir beledî döşek ve bir şilte ve bir baş yasdığı ve bir yüz yasdığını hâlâ teslîm etmeyip zimmetinde olmağla bi’l-vekâle hâlâ taleb ederim deyü da‘vâ ve mezbûr Ahmed Efendi cevâbında fi’l-hakīka eşyâ-i muharrere-i mezkûre zevcesi müvekkile-i mezbûrenin mehr-i mu‘acceli olmak üzere zimmetinde olduğunu ikrâr ve târih-i kitâbdan on gün tamamında tamamen teslîme ta‘ahhüd eyledikde müdde‘iye-i mezbûre dahi râziye olup bu vechile beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 29 min-Ca sene 1204