Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 159 Hüküm no: 72 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil v. Esteryo’nun Mihal’e olan borcunu kefil olan kardeşi Dimitri’nin ödemesi Ma‘rûz Mahrûse-i Galata’ya muzâfe Beşiktaş kasabasına tâbi‘ Arnabud (Arnavud) karyesinde mütemekkin Mihal v. Yanaki nâm zimmî medîne-i Üsküdar’da mahfil-i bâbda meclis-i şer‘-i hatîrde Dimitri v. Esteryo nâm zimmî muvâcehesinde merkūm Dimitri zimmî târih-i i‘lâmdan bir buçuk sene mukaddem karındaşı gāib ani’l-meclis Vasil zimmî zimmetinde cihet-i karz-ı şer‘îden olan bin yedi yüz guruş alacak hakkıma tarafeynden bi’l-emr ve’l-kabûl kefâlet-i sahîha-i şer‘iye ile kefîl ve dâmin olmağla meblağ-ı merkūm bin yedi yüz guruşu kefâletine binâen hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını udûl-ı millet-i Nasârâdan oldukları lede’t-tezkiye zâhir olan Todori v. Gurpe ve Yorgi v. Apostol nâm zimmîler şehâdetleriyle vech-i şer‘î üzere muvâcehesinde isbât etmeğin mûcebiyle meblağ-ı merkūm bin yedi yüz guruşu müdde‘î-i merkūma bi-hükmi’l-kefâle edâ ve teslîme merkūm Dimitri zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 29 min-C sene 1204