Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 159 Hüküm no: 74 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı Seyyid Ahmed’in ortaklığı feshettikleri Mehmed Emin b. Halil’de sermaye ve kârdan alacağı olduğu iddiasıyla açtığı davada haksız bulunduğu Ma‘rûz Medîne-i Üsküdar’da Gerede mahallesinde sâkin es-Seyyid Ahmed b. Mustafa medîne-i mezbûrede mahfil-i bâbda meclis-i şer‘-i hatîrde Mehmed Emin b. Halil mahzarında târih-i i‘lâmdan üç buçuk sene mukaddem iki yüz guruş sermâye olmak üzere mezbûr Mehmed Emin’e def‘ ü teslîm eylediğimde ol dahi yedimden ba‘de’l-ahz ve elli guruş dahi kendinin sermâyesi olup hâsıla olan fâidenin sülüsü benim ve sülüsânı mezbûr Mehmed Emin’in olmak üzere yorgancılık san‘atında bir sene şerîk olup ba‘dehû fesh-i şirket ve ahz ü i‘tâmızın hesâbını rü’yet eylediğimizde elli bir guruş fâide hâsıla olmağla benim sülüs hisseme isâbet eden on yedi guruş ile medfû‘um olan meblağ-ı merkūm iki yüz guruşun yüz elli guruşunu yedinden ahz bâkī elli guruş ki cem‘an altmış yedi guruşu taleb ederim deyü da‘vâ ve mezbûr Mehmed Emin cevâbında müdde‘î-i mezbûr ile ber-vech-i muharrer şirketini ikrâr ve fâide hâsıl olduğunu inkâr ve sermâyeden dahi kabzını mu‘terif olduğu yüz elli guruşdan mâ‘adâ elli guruşunu dahi edâ etmiş idim deyü eylediği def‘ini el-Hâc Mustafa b. Kasım ve el-Hâc Mehmed b. İsmail nâm kimesneler şehâdetleriyle vech-i şer‘î üzere muvâcehesinde ba‘de’l-isbât müdde‘î-i mezbûr dahi on yedi guruş müdde‘âsını isbâta kādir olamayıp tahlîfe dahi tâlib olmamağla mûcebiyle müdde‘î-i mezbûr on yedi guruş da‘vâsıyla mezbûr Mehmed Emin’e bilâ-beyyine ve elli guruş da‘vâsıyla bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 26 min-Ca sene 1204