|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 251 Hüküm no: 349 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Yorgi v. İstemat’ın değirmen aletlerindeki kendi hissesini Andriya v. Yani’ye sattığı
Değirmenci tâifesinden Yorgi v. İstemat nâm zimmî mahfil-i kazâda yine tâife-i mezbûreden işbu bâ‘isü’l-kitâb Andriya v. Yani muvâcehesinde ikrâr-ı tâm ve takrîr-i kelâm edip mahmiye-i İstanbul’da Sığırcılar? Câmi‘-i şerîfi kurbünde vâki‘ merhûm ( ) evkāfından icâre-i mu‘accele ve müeccele ile hâlâ Abdülbâki Çavuş b. Hasan Çavuş’un tasarrufunda olan menzilinde vâki‘ bir göz at değirmeni ve iki değirmen taşını ve dört anbarı ve altı re’s değirmen atları ve beynimizde ilm-i şer‘î ile ma‘lûm sâir değirmen âlâtında benim mülk ve hakkım olan rub‘-ı şâyi‘ini mezbûr Andriya’ya on iki bin nakd râyic fi’l-vakt fıddî akçeye tarafeynden kabûlü hâvî bey‘-i bâtt-ı sahîh-i şer‘î ile bi-safkatin vâhidetin bey‘ ve teslîm edip ol dahi minvâl-i muharrer üzere iştirâ ve kabûl ve kabz eyledikden sonra semeni olan meblağ-ı mezbûr on iki bin akçeyi bi’t-tamam ve’l-kemâl ahz u kabz eyledim, ba‘de’l-yevm mezbûr Andriya’nın mülk-i müşterâsıdır, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î bi’t-taleb ketb olundu.
Fi’l-yevmi’l-âşir min-Cemâziyelâhire li-sene erba‘a ve sittin ve elf.
Şuhûdü’l-hâl: İbrahim Çelebi b. Davud, Pîrî b. Hüseyin, el-Hâc Şa‘ban b. Mehmed ve Rıdvan b. Abdullah.
|