Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 162 Hüküm no: 79 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sergiz’in borcunu Kirkor’a ödemesi Ma‘rûz Medîne-i Üsküdar’da Yenimahalle mütemekkinlerinden Kirkor nâm sagīrin min-kıbeli’l-üm ceddesi ve tesviye-i umûruna bâ-hüccet-i şer‘iye vasîsi Horisima bt. Gabril nâm Nasrâniye tarafından ber-vech-i âtî vekîl olduğu şahs-ı merkūmeyi ârifân Mustafa Efendi b. Mehmed ve es-Seyyid Mehmed Tâhir Efendi b. Ahmed nâm kimesne nâm kimesneler şehâdetleriyle sâbit olan Karabet v. Piyeri nâm zimmî medîne-i mezbûrede mahfil-i bâbda meclis-i şer‘-i hatîrde sagīr-i merkūmun mâl-ı mevrûsundan bi’l-vesâye ahz ü kabz eylediği üç bin beş guruşun bin üç yüz yetmiş guruşunu kendi umûruna sarfla istihlâk ve bin altı yüz otuz beş guruşunu gāibûn ani’l-meclis Abdurrahman b. Abdullah ve Hamza Beşe b. Abdullah nâm kimesneler ile Karabet v. Kigork ve Honkik ve Eveb? ve Delot ve Evanis v. Serkiz ve Serkiz v. Kabril ve diğer Avanis v. Mıgırdıç nâm zimmîlere idâne ve teslîm edip lâkin idânesi bilâ-rehn olmağla vasîyy-i merkūm Serkiz zimmî meblağ-ı merkūm bin altı yüz otuz beş guruşa tarafeynden bi’l-emr ve’l-kabûl kefâlet-i sahîha-i şer‘iye ile kefîl ve dâmin olmağla asâlet ve kefâletine binâen taleb ederim deyü bi’l-vekâle da‘vâ ve merkūm Serkiz zimmî fi’l-hakīka sagīr-i merkūmun mâlından bin üç yüz yetmiş beş guruş kendi umûruna sarfla istihlâk eylediğini ve bin altı yüz otuz beş guruşa kefîl ve dâmin olduğunu ikrâr ü i‘tirâf etmeğin mûcebiyle meblağ-ı mecmû‘-ı merkūm üç bin beş guruşun sagīr-i merkūm için vekîl-i merkūm Karabet zimmîye asâlet ve kefâleten edâsıyla merkūm Serkiz zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 7 min-C sene 1204