Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 164 Hüküm no: 84 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Salih ile hanımı Fatma’nın eşyalarını alan Mustafa’dan eşyaların alınıp sahiplerine teslim edildiği Ma‘rûz Medîne-i Üsküdar’da Vâlide-i Atik mahallesinde Çavuşderesi nâm mahâlde sâkin Mehmed Salih b. Halil ve zevcesi mu‘arrefetü’z-zât Fatıma bt. Muslu nâm hatun medîne-i mezbûrede mahfil-i bâbda meclis-i şer‘-i hatîrde mahalle-i mezbûre subaşısı Halil muvâcehesinde ahz ve ihzâr olunan Mustafa b. Ahmed mahzarında mezbûr Mustafa târih-i i‘lâm günü mahâll-i merkūmda vâki‘ menzilimize duhûl ve eşyâ-i memlûkemizden cem‘an kıymetleri elli guruşa bâliğ bir Kelâm-ı kadîm ve üç gömlek ve iki peştamal ve iki çârşeb ve bir top bez ve bir çintiyân ve bir yaşmak ve bir makrama ve bir mağrib şalı ve bir havlu ve üç beyaz entari ve bir Şam alacası entari ve iki döşek çârşebi ve altı değirmi yemeni ve bir minder gılâfı ve on beş zirâ‘ iplik ve bir mikdâr destgâhdan kat‘ olunmuş bez ve iplik ve iki şalî cebe ve dört don ve üç makrama ve bir silecek ve bir destâr, otuz yaşma[k]? ve bir boğça ve bir döşek gılâfı ve bir lenger ve bir tas ve iki kalıp sabunumuzu sirka ve ahz edip hâlâ yedinde bulmamızla taleb ederiz deyü da‘vâ ve mezbûr Mustafa istintâk olundukda eşyâ-i mezkûreyi fevâhişeden bir avrat benim menzil-i mezkûrda eşyâm olup İslâmbol’a nakl murâd etmemle bana i‘âne eyle dediğine binâen ben dahi mağrûr olup menzil-i mezkûr kapısında durup eşyâ-i mezkûreyi derûn-ı menzilden ahz ve bana teslîm etmiş idi deyü kendi ahzını inkâr eyledikde mahâll-i merkūm sâkinlerinden es-Seyyid Yahya b. Mehmed ve Murad b. Mehmed nâm kimesneler ile zâtı mu‘arrefe Zeliha bt. Mehmed nâm hatundan herbiri istintâk olundukda mezbûr Mustafa eşyâ-i mezkûreyi tahammül edip zevcân-ı mezbûrânın menzilleri duvarından ihrâc eylediğini ve eşyâ-i mezkûre zevcân-ı mezbûrânın mülkleri olduğunu alâ-tarîki’ş-şehâde ba‘de’l-ihbâr mûcebiyle eşyâ-i mezkûre zevcân-ı mezbûrâna teslîm eylediği bi’l-iltimâs huzûr-ı âlîlerine i‘lâm olundu. Fî 6 min-B sene 1204