Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 168 Hüküm no: 90 Orijinal metin no: [9a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Bilal’in, kendisini evlilik bahanesiyle kandırıp eşyalarını aldığını iddia ettiği Mehmed aleyhindeki davasını ispat edemediği Ma‘rûz Medîne-i Üsküdar’da Arakıyeci el-Hâc Mehmed mahallesinde sâkine ve zâtı mu‘arrefe Âişe bt. Bilal nâm bikr-i bâliğa medîne-i mezbûrede mahfil-i bâbda meclis-i şer‘-i hatîrde Mehmed b. Süleyman mahzarında mezbûr Mehmed târih-i i‘lâmdan üç ay mukaddem seni tezevvüc ederim deyü beni ıdlâl ve Yenimahalle’de bir kefere menziline götürüp bana cebren zinâ edip bikrimi izâle eylediğinden gayri mecmû‘-ı kıymetleri on beş guruşa bâliğ hizmetinde olduğum hâzıratü bi’l-meclis Fatıma bt. İbrahim nâm hatunun emlâkından olup âhara bey‘ için yedime îdâ‘ ve teslîm eylediği dört aded çevreleri mezbûr Mehmed fuzûlen yedimden ahz etmekle zikr olunan çevrelerin kıymetlerini ve izâle-i bikrin mûcib-i şer‘îsini taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âlarını isbâta kādire olamayıp ve zinâ için şer‘an tahlîf lâzım gelmeyip ancak zikr olunan çevreler için bi’t-taleb mezbûr Mehmed gıbbe’t-tahlîfi’ş-şer‘î mûcebiyle mezbûr Mehmed [mezbûre Âişe] husûs-ı mezkûrda bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 12 min-B sene 1204