Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 169 Hüküm no: 91 Orijinal metin no: [9a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hacı İbrahim’in kendisini belinden şiş ile yaralayan Mehmed b. Abdullah’la sulh oldukları Ma‘rûz Medîne-i Üsküdar’da Solaksinan mahallesinde sâkin vech-i âtî üzere şiş yarasıyla mecrûh idiği lede’l-keşf ve’l-mu‘âyene zâhir olan Mehmed nâm kimesnenin babası ve tarafından sulh ve ibrâya vekîl olduğu el-Hâc İsmail b. İsmail ve el-Hâc Mehmed Salih b. Mehmed nâm kimesneler şehâdetleriyle sâbit olan el-Hâc İbrahim b. Ali nâm kimesne medîne-i mezbûrede meclis-i şer‘-i hatîrde diğer Mehmed b. Abdullah nâm kimesne mahzarında mezbûr diğer Mehmed târih-i i‘lâmdan on beş gün mukaddem müvekkilim mezbûr Mehmed’i medîne-i mezbûrede Kavak İskelesi’nde bi-gayrı hakkın amden şiş ile belinin ortasından bir yerinden darb ve cerh etmekle mûcib-i şer‘îsini bi’l-vekâle taleb ederim deyü tasaddî eylediği da‘vâsından bâ-tavassut-ı muslihîn otuz guruş bedel-i makbûza sulh olup cerh-i mezkûra ve mâ yuhdesü minhe müte‘allika âmme-i de‘âvîden mezbûr diğer Mehmed’in zimmetini ibrâ ve ıskāt ol dahi ber-vech-i muharrer ibrâsını kabûl edip bu vechile kat‘-ı münâza‘a eyledikleri medîne-i mezbûre mahkemesinde tescîl ve bi’l-iltimâs huzûr-ı âlîlerine i‘lâm olundu. Fî 13 min-B sene 1204