Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 170 Hüküm no: 93 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Hafız Mustafa Efendi’nin sattığı attar eşyası bedelinden Mardıros v. İstefan’da kalan alacağının ödenmesi talebiyle açtığı davada Mardıros’un borcunu ödediğini ispat ettiği Ma‘rûz Medîne-i Üsküdar’da Davudpaşa mahallesinde sâkin Attar Hafız Mustafa Efendi b. el-Hâc Mehmed medîne-i mezbûrede mahfil-i bâbda meclis-i şer‘-i hatîrde Mardıros v. İstefan nâm zimmî muvâcehesinde merkūm Mardıros zimmî târih-i i‘lâmdan on ay mukaddem yedimden ve mâlımdan iştirâ ve kabz eylediği vezn ve fiyâtı beynimizde ma‘lûm attâr emti‘ası semeninden üç yüz dört guruş otuz altı para hakkımın yüz altmış dört guruş on altı parasını yedinden ahz ü istifâ ve yüz kırk guru[ş] zimmetinde hakkım bâkī kalmağla hâlâ taleb ederim deyü da‘vâ ol dahi cevâbında fi’l-hakīka semen-i mezkûreden müdde‘î-i mezbûra ol-mikdâr meblağ deyni olduğunu ikrâr lâkin müdde‘î-i mezbûrun kabzını mu‘terif olduğu yüz altmış dört guruş on altı paradan mâ‘adâ yüz kırk buçuk guruş dahi kendiye tamamen def‘ ü teslîm etmiş idim deyü ba‘de’d-def‘ ve’l-inkâr merkūm Mardıros zimmî ber-vech-i muharrer def‘ini udûlden İsmail Ağa b. Abdullah ve Mustafa Ağa b. İsmail nâm kimesneler şehâdetleriyle ber-nehc-i şer‘î muvâcehesinde isbât etmeğin mûcebiyle müdde‘î-i mezbûr Hafız Mustafa Efendi da‘vâ-yı mezkûresiyle merkūm Mardıros zimmîye bî-vech-i şer‘î mu‘ârazadan men‘ olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 10 min-B sene 1204