Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 171 Hüküm no: 94 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Beşe’nin dükkânını İstati ve Todori adlı gayrimüslimlere kiraya vermekten men edildiği ve bunların Müslümanların bulunduğu mahalde dükkân açmalarına izin verilmediği Ma‘rûz Medîne-i Üsküdar’da Davudpaşa mahallesinde Kavukçular Çarşısı ahâlisinden eş-Şeyh Ahmed Efendi b. Abdullah ve İbrahim Beşe b. Mustafa ve es-Seyyid İsmail b. Hasan ve Ahmed Ağa b. Osman ve el-Hâc Ali Ağa b. Mustafa ve es-Seyyid Halil Ağa b. el-Hâc Hüseyin ve es-Seyyid Hasan b. Hüseyin ve es-Seyyid Numan Ağa b. el-Hâc Abdulkadir ve Mehmed b. Hasan ve Mustafa b. İbrahim ve Osman b. Veli ve Ahmed Beşe b. Mehmed ve Mehmed Beşe b. Hüseyin ve es-Seyyid Ali b. Mehmed ve Ali Ağa b. Mehmed ve Mustafa b. Hüseyin ve Ahmed Ağa b. Ataullah nâm kimesneler medîne-i mezbûrede mahfil-i bâbda meclis-i şer‘-i hatîrde mahalle-i mezbûrede yoğurtçu ve südcü kârhânesinde sâkin Mahmud Beşe b. el-Hâc Ali mahzarında mezbûr Mahmud Beşe mahalle-i mezbûrede vâki‘ kutbü’l-ârifîn Kösec Mehmed Efendi ve sâir kibâr-ı ehlullâh türbeleri ittisâlinde bir bâb kebâbcı dükkânı olup kadîmden ehl-i İslâm’a îcâr olunagelmiş iken bu esnâda dükkân-ı mezkûru hedm ve medîne-i mezbûrede Kefçe mahallesinde kadîm boyacı dükkânında mütemekkin gāibân ani’l-meclis İstati v. Foci ve Todori v. Kalodi nâm zimmîlere îcâr ve boyacı dükkânı olmak üzere merkūmân zimmîleri iskân murâd edip hattâ merkūmân zimmîler bundan [akdem] medîne-i mezbûrede Büyükhamam karşısında ehl-i İslâm sâkin olduğu dükkânı boyacı dükkânı etmek murâdıyla dükkân-ı mezkûru hedm ba‘dehû men‘ olunup hâlâ mezbûr Mahmud Beşe’yi ziyâde ücret ile itmâ‘ ve istîcâr edip dükkân-ı mezkûr çirkâbından cümlemiz müte’ezzî olacağımızdan mâ‘adâ kadîmden ehl-i İslâm sâkin olup derûnunda Kur’ân-ı azîmü’ş-şân tilâvet olunur iken hâlâ kefereye îcâr ve leyl ü nehâr ikāmet ve makābir-i Müslimîn ittisâlinde şürb-i hamr ve sâir âyîn-i bâtılalarını icrâ ve bu misillü ehl-i İslâm sâkin olduğu mahâlde kefereyi iskân etmek fermân-ı âlî ile memnû‘ olunmuş idi deyü mezbûr Mahmud Beşe muvâcehesinde teşekkî ve dükkân-ı mezkûr kadîmî üzere ehl-i İslâm’dan birine îcâr ve merkūmân zimmîler dahi fîmâ-ba‘d bu misillü ehl-i İslâm dükkânını boyacı dükkânı etmek irâdesiyle ibâd-ı Müslimîni ızrâr ve ta‘cîz etmeyip kadîmden boyacı olduğu mahâlde ikāmet [etmek] üzere fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 15 min-Receb sene 1204