Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 172 Hüküm no: 95 Orijinal metin no: [9b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aksabet v. Avak’ın, mirasından kendisine intikal eden İstavroz köyündeki bağ ile eşyaları zapt ettiği iddiasıyla Kiragos v. Mosis’e açtığı davada Kiragos’un bağ ve eşyaları satın aldığını ispat ettiği Ma‘rûz Medîne-i Üsküdar’da Selami mahallesinde mütemekkin iken bundan akdem hâlik [olan] Nikagos v. Avak nâm zimmînin li-ebeveyn kız karındaşı ve hasran vârisi olan Aksabet nâm Nasrâniye tarafından ber-vech-i âtî vekîl olduğu şahsını ârifân Serkiz v. Karabet ve Hanparsum v. Arakil nâm zimmîler şehâdetleriyle sâbit olan Gaspar v. Mosis nâm zimmî medîne-i mezbûrede mahfil-i bâbda meclis-i şer‘-i hatîrde hâlik-i merkūmun kızının oğlu ve zikri âtî bağ ve eşyâya vâzı‘ü’l-yed olan Kiragos v. Mosis nâm zimmî muvâcehesinde medîne-i mezbûreye tâbi‘ İstavros karyesi hâricinde vâki‘ etrâf-ı erba‘ası Kara Ahmed oğlu Hüseyin ve Dülger Kalfa ve Angeli zimmî bağları ve tarîk-ı âm ile mahdûd tahmînen on dönüm mikdârı bir kıt‘a kürûmu mülk harâb bağ ile altı beledî yasdık ve iki minder ve bir döşek ve iki yorgan ma‘a çârşeb ve iki tencere ve dört sahan ve bir tek öküz ve bir saban demiri ve âlât-ı lâzımesi hâlik-i merkūmun yanında ile’l-helâk yedinde mülkü ve ba‘de helâkihî hasran müvekkilem merkūmeye mevrûs olmuş iken merkūm Kiragos zimmî bi-gayrı hakkın vaz‘-ı yed etmekle bağ-ı mezkûr ile eşyâ-i mezkûreden kasr-ı yed ve müvekkilem mersûmeye teslîme tenbîh olunmak bi’l-vekâle matlûbumdur deyü da‘vâ ve merkūm Kiragos zimmî cevâbında hâlik-i merkūm Nikagos zimmî hâl-i hayatında ve kemâl-i akl ü sıhhatinde bağ-ı mezkûr ile eşyâ-i mezkûreyi safka-i vâhide ile iki yüz otuz guruşa bâ-hüccet-i şer‘iye bana bey‘ ve temlik ve teslîm eyledikde ben dahi iştirâ ve kabûl ve semeni olan iki yüz otuz guruşu karz-ı şer‘îden zimmetinde bana deyni olan iki yüz otuz guruşa mahsûb ve takas eyledikde ben dahi mukāssa ve kabûl edip târih-i [bağ-ı] mezkûr ile eşyâ-i mezkûre mülk-i müşterâm olmağla bi-hakkın vaz‘-ı yed ederim deyü takrîri üzere bir kıt‘a hüccet-i şer‘iye ibrâzıyla ba‘de’d-def‘ ve’l-inkâr merkūm Kiragos zimmî def‘-i mezkûrunu udûl-ı millet-i Nasârâdan Serkiz v. Karabet ve Arakil v. Kirkor nâm zimmîler şehâdetleriyle vech-i şer‘î üzere bi’l-muvâcehe isbât etmeğin mûcebiyle vekîl-i merkūm Gaspar zimmî da‘vâ-yı mezkûresiyle merkūm Kiragos zimmîye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 20 min-C sene 1204