Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 173 Hüküm no: 96 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardıros v. Davit’in vârislerinin, vefat eden Mardıros’un kardeşi Matos’un terekesindeki âletlerle ilgili iddialarının zaman aşımı nedeniyle reddedildiği Ma‘rûz Medîne-i Üsküdar’da Selami mahallesinde mütemekkin iken bir sene mukaddem hâlik olan Mardıros v. Davit nâm zimmînin verâseti zevce-i metrûkesi Gül bt. Manuk nâm Nasrâniye ile sulbî kebîr oğlu Davit ve sulbiye-i sagīre kızları Maryem ve Hannazanta’ya münhasıra ve tashîh meselesi otuz iki sehm i‘tibârıyla dört sehmi zevcesi merkūmeye ve on dört sehmi oğlu merkūma ve yedişer sehmi kızları sagīretân-ı mersûmetâna isâbeti tahakkukundan sonra merkūm Davit zimmî asâleten ve arzuhâl eden şahsı mu‘arrefe zevce-i mersûme Gül Nasrâniye kendi nefsinden asâleten ve kızları sagīretân-ı merkūmetân Maryem ve Hannazanta’nın tesviye-i emirlerine vasîleri olmağla vesâyeten Çarşamba günü Dîvân-ı âlî’de ma‘kūd meclis-i şer‘-i hatîrde hâlik-i merkūmun li-ebeveyn karındaşı olup ba‘dehû hâlik olan Matos v. el-merkūm Davit zimmînin zevce-i metrûkesi ve evlâd-ı sıgārının vasîyy-i mansûbeleri ve zikri âtî gedik âlâtına vâzı‘atü’l-yed olan kezâlik şahsı mu‘arrefe ve arzuhâlde ismi mezkûre Maryem bt. Haçador nâm Nasrâniye muvâcehesinde hâlik-i merkūm Matos zimmînin ile’l-helâk icâreteyn ile taht-ı tasarrufunda olan mahalle-i mezbûrede vâki‘ lede’l-ahâli ve’l-cîrân ma‘lûmü’l-hudûd bir bâb vakıf menzili tahtında kâin bir bâb kahve ve duhânî dükkânı derûnunda mevcûd beyne’l-esnâf gedik ta‘bîr olunur âlât-ı lâzıme-i ma‘lûme târih-i i‘lâmdan yirmi dört sene mukaddem mûrisimiz hâlik-i evvel merkūm Mardıros zimmînin yedinde mülkü iken karındaşı hâlik-i sânî-i merkūm Matos zimmîye îcâr edip ol dahi âlât-ı mezkûreye mutasarrıf olmuş idi lâkin mûrisimiz hâlik-i merkūm Mardıros zimmî hâl-i hayatında karındaşı hâlik-i sânî-i merkūm Matos zimmî ile bir beldede yirmi dört sene mütemekkinler olup âlât-ı mezkûreye vaz‘-ı yed etmeyip ba‘de’l-helâk bize mevrûs olduğuna binâen âlât-ı mezkûreyi asâleten ve vesâyeten zevce-i merkūme Maryem Nasrâniyeden taleb ederiz deyü da‘vâ ve merkūme Maryem Nasrâniye cevâbında müdde‘iyân-ı merkūmânın müdde‘âlarını inkârından mâ‘adâ dükkân-ı mezkûr târih-i merkūmda harâb kahve dükkânı olup âlâtı ve gediği olmayıp zevcim hâlik-i merkūm Matos zimmî dükkân-ı mezkûru bâ-ma‘rifet-i mütevellî mutasarrıfından tefevvüz ve müceddeden üzerine bir menzil ve tahtına bir bâb kahve ve duhânî dükkânı binâ ba‘dehû bâ-fermân-ı âlî duhânî esnâfının nizâm-ı cedîdine dâhil ve Başmuhâsebe’ye kayd ve helâki târihine gelince yirmi iki sene karındaşı hâlik-i merkūm Mardıros zimmî muvâcehesinde bilâ-nizâ‘ mutasarrıf olup işbu yedimde olan bir kıt‘a i‘lâm-ı şer‘î nâtık olduğu üzere yirmi altı gün mukaddem merkūm Mardıros âlât-ı mezkûreyi Üsküdar mahkemesinde benden da‘vâ ben dahi ber-vech-i muharrer zevcim hâlik-i merkūmun mülkü olup yirmi dört sene karındaşı hâlik-i merkūm muvâcehesinde bilâ-nizâ‘ mutasarrıf olduğunu bi’ş-şöhret ve’t-tevâtür isbât etmemle merkūm Davit da‘vâ-yı mezkûresiyle bî-vech mu‘ârazadan men‘ olunmuş idi deyü takrîr-i meşrûhuna mutâbık bir kıt‘a i‘lâm-ı şer‘î ibrâzıyla eylediği def‘ini müdde‘iyân-ı merkūmân ikrâr etmeğin mûcebiyle meşhûr ve mütevâtirin hilâfına ikāmet olunan beyyine makbûle olmadığından gayri bu misillü yirmi dört sene bilâ-özr-i şer‘î terk olunan mülk âlât da‘vâsının bilâ-emr istimâ‘ından hükkâm memnû‘lar olup müdde‘iyân-ı merkūmânın da‘vâ-yı mezkûrları mesmû‘a olmamağla kemâ-fi’l-evvel bî-vech mu‘ârazadan men‘ olundukları mübâşiri çavuş kulları iltimâsıyla huzûr-ı âlîlerine i‘lâm olundu. Fî 8 min-B sene 1204