Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 177 Hüküm no: 103 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacacı Nifor v. Bedros’un, Sarrâf İstefan’a ait yağhanenin Kıbrıs’taki Ümmülhiram Camii vakfına ait olup vakıftan satın aldığından kendisine iade edilmesi talebiyle açtığı davada haksız bulunduğu Ma‘rûz Mahmiye-i İslâmbol’da Sahhâflar Çarşısı’nda alacacı arzuhâl eden Nifor v. Bedros nâm zimmî Çarşamba günü Dîvân-ı âlî’de ma‘kūd meclis-i şer‘-i hatîrde medîne-i Üsküdar’a tâbi‘ Kādı karyesi mütemekkinlerinden Vâlidehanı’nda sarrâf arzuhâlde ismi mezkûr İstefan v. Avanis nâm zimmî muvâcehesinde karye-i mezbûrede vâki‘ bir tarafdan ba‘zan Kürd Süleyman ve ba‘zan Receb oğlu ve ba‘zan Hüseyin Paşa kerîmesi menzilleri ve üç tarafdan tarîk-ı âm ile mahdûd büyût-ı adîdeli mez[bûr] Kürd Süleyman menzili tarafında çifte yağhâne ve demirci dükkânını müştemil bir bâb mülk menzil müteveffiye Âişe Hanım bt. Ahmed’in hâl-i hayatında yedinde mülkü iken bin yüz doksan beş senesi yağhâne-i mezkûreyi zevci müteveffâ Acem Ali Ağa’nın vakfı olan Kıbrıs cezîresinde medfûn Ümmü’l-hiram hazretlerinin câmi‘-i şerîfi vakfına teberru‘ edip yağhâne-i mezkûreye vakfiyet üzere mutasarrıfe iken vefât eyledikde işbu yedimde olan bir kıt‘a vakıf temessüğü nâtık olduğu üzere bin iki yüz iki senesi sadrî kebîr oğlu Mustafa Ağa’ya intikāl ve mezbûr Mustafa Ağa vakf-ı mezbûrun meşrûtiyet üzere mütevellîsi olmağla yağhâne-i mezkûreyi üç bin beş yüz guruş bedel-i makbûz mukābelesinde bana ferâğ ve tefvîz edip tasarrufumda iken merkūm İstefan zimmî menzil-i mezkûru mezbûre Âişe Hanım’dan mülkiyet üzere iştirâ eyledim deyü beni tasarrufumdan men‘ ve yağhâne-i mezkûreye bi-gayrı hakkın müdâhale etmekle men‘ ü def‘ olunmak matlûbumdur deyü da‘vâ ve merkūm İstefan zimmî cevâbında menzil-i mezkûru cemî‘ tevâbi‘ ve levâhıkıyla bin yüz seksen bir senesi müteveffât-ı mezbûre Âişe Hanım semen-i medfû‘ ve makbûza Han kapıkethudâsı veresesinden bâ-hüccet-i şer‘iye iştirâ ve temellük ve ba‘dehû bin yüz doksan yedi senesi müteveffât-ı mezbûre Âişe Hanım dahi benim ile şerîkim Norsis zimmîye kezâlik cemî‘ tevâbi‘ ve levâhıkıyla münâsafaten bey‘ ve temlik ve şerîkim mezbûr Norsis zimmî dahi altı ay mukaddem nısf hissesini bana bey‘ ve temlik edip mecmû‘u mülk-i müşterâm olmağla yağhâne-i mezkûre menzil-i mezkûr hudûdu dâhilinde olup tevâbi‘ ve levâhıkındandır deyü yağhâne-i mezkûrenin vakfiyetini inkâr ve müdde‘î-i merkūm dahi merkūm İstefan zimmî ile şerîkim merkūm Norsis zimmî menzil-i mezkûru müteveffât-ı mezbûre Âişe Hanım’dan iştirâ eyledikleri hüccetde yağhâne-i mezkûre sarâhaten tahrîr olunmayıp yağhâne-i mezkûre ba‘dehû dâhil değildir deyü tevâbi‘ ve levâhıkında ihtilâf etmeleriyle tarafeynin iltimâslarıyla li-ecli’t-tahkīk kıbel-i şer‘-i şerîfden Mustafa Efendi dâ‘îleri irsâl olunup ol dahi menzil-i mezkûra varıp huzûr-ı Müslimînde akd eylediği meclis-i şer‘-i şerîfde merkūm İstefan zimmînin yedinde olan üç kıt‘a mülknâme hüccetlerinde menzil-i mezkûrun müştemilâtından sundurma deyü tahrîr olunan mahal yağhâne olup menzil-i mezkûrun tevâbi‘ ve levâhıkından olduğunu ve bâlâda mezkûr bin yüz seksen bir senesinden işbu târih-i kitâba gelince mülkiyet üzere tasarruf olunduğunu karye-i mezbûre ahâlisinden İmâm es-Seyyid Mehmed Emin Efendi b. Hasan ve Mustafa Efendi b. Mehmed ve diğer Mustafa b. Süleyman ve Abdi Efendi b. el-Hâc İbrahim ve el-Hâc Mustafa Ağa b. Hasan ve Mahmud Ağa b. Hüseyin ve İsmail Ağa b. el-Hâc Ahmed ve Hüseyin Beşe b. Ahmed ve diğer Hüseyin b. Osman ve İbrahim b. Abdullah nâm kimesneler alâ-tarîki’ş-şehâde haber vermeğin yağhâne-i mezkûre ber-vech-i muharrer menzil-i mezkûr hudûdu dâhilinde olup tevâbi‘ ve levâhıkından olduğu lede’l-mu‘âyene ve’l-ihbâr zâhir olduğu ba‘de’l-inhâ vakf-ı mezbûr kimesnenin ma‘lûmu olmayıp ve mütevellî ve kāimmakāmı dahi olmadığından mâ‘adâ merkūm İstefan zimmînin yedinde sebeb-i mülk olur müstenid-i şer‘îye binâen vakf-ı mezbûrun sübûtunda semâ‘la şehâdet makbûle olmayıp ve merkūm Nifor zimmî dahi yağhâne-i mezkûreyi müteveffât-ı mezbûre Âişe Hanım’a tescîl-i şer‘î ve teslîm ile’l-mütevellî eylediğini tashîh ve beyân edemeyip mücerred vakfa teberru‘ etmiş idi deyü eylediği vakfiyet da‘vâsına iltifât olunmayıp yağhâne-i mezkûre mülkiyet üzere merkūm İstefan zimmî yedinde ibkā olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 8 min-B sene 1204