Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 383 Hüküm no: 390 Orijinal metin no: [89a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası İbrahim b. Mehmed’den boşanan Kıbtî tâifesinden Fâtıma’nın mehrini tamamen aldığı Nikâh ve nafakadan sulh. Mahmiye-i İstanbul’da Manisalı Çelebi Mahallesi sâkinelerinden olup zâtı Mehmed b. Hüseyin ve Ahmed b. Osman nâm kimesneler ta‘rîfleriyle mu‘arrefe olan Fâtıma bt. Mustafa nâm Kıbtiye meclis-i şer‘-i hatîr-i lâzımü’t-tevkīrde <> zevc-i dâhili işbu bâ‘isü’l-kitâb İbrahim b. Mehmed nâm Kıbtî mahzarında ikrâr ve takrîr-i kelâm edip mezbûr İbrahim târih-i kitâb günü beni bâyinen tatlîk etmekle zimmetinde mütekarrir ve ma‘kūdun-aleyh olan bin beş yüz akçe mehr-i müeccelim ile nafaka-i iddet ve meûnet-i süknâm için bi’t-terâzî ta‘yîn olunan üç yüz akçe ki cem‘an bin sekiz yüz akçeyi mezbûr İbrahim bana tamamen def‘ ve teslîm ben dahi meblağ-ı mezbûru merkūm İbrahim yedinden ahz u kabz eylediğimden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-şehri Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Abdullah Çelebi b. Mustafa, es-Seyyid Ali b. es-Seyyid Mustafa, Ahmed Çelebi b. Hasan, Mehmed b. Ahmed, Mehmed Çelebi b. Kasım, Salih Çelebi b. Hasan İbrahim Çelebi b. Mustafa.