Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 384 Hüküm no: 391 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Selim b. Halîfe’nin fırın yapmakmak için harcadığı parayı Mustafa Paşazâde Ahmed Bey’den tamamen aldığı Mahmiye-i İstanbul’da Laleliçeşme kurbünde sâkin el-Hâc Selim b. Halîfe nâm kimesne meclis-i şer‘-i şerîf-i enverde râfi‘u’l-kitâbi’l-müstetâb Mustafa Paşazâde fahrü’l-eşbâh Ahmed Bey tarafından husûs-ı âti’l-beyânı tasdîka vekîl olduğu Mehmed Bey b. Ali ve Ali Bey b. Süleyman şehâdetleriyle sâbit olan es-Seyyid Mehmed Efendi b. Süleyman mahzarında ikrâr-ı tâm ve takrîr-i kelâm edip müvekkil-i mûmâ-ileyh Ahmed Bey İstanbul’da Eski odalar kurbünde Çukurçeşme’de Molla Kestel Vakfı’ndan tasarrufunda olan ma‘lûmü’l-hudûd kasab dükkânını mâlımdan masrûfumu icâresinden istîfâ eylemek üzere çörekçi fırını binâsına bana emretmekle ben dahi bi-şartü’r-rücû‘ mâlımdan yüz seksen guruş harc ve sarf ve binâ eylediğimden sonra fırın-ı mezbûrda nân tabhından men‘ olunduğuma binâen masrûfum olan meblağ-ı mezbûru mûmâ-ileyh Ahmed Bey tarafından vekîl-i mezbûr es-Seyyid Mehmed Efendi’den bundan akdem taleb ve da‘vâ ettiğimde ol dahi cevâbında müvekkil-i mûmâ-ileyh Ahmed Bey’in ber-vech-i muharrer dükkânı icâresinden istîfâ eylemek üzere bana izin ve emrini bi’l-vekâle i‘tirâf lâkin masrûfun henüz ma‘lûmum değildir deyü inkâr eyledikde sâdır olan fermân-ı âlîye binâen kıbel-i şer‘den ta‘yîn ve irsâl olunan Mevlânâ Mehmed Abdullah Efendi ve hâssa mi‘mârlardan Mehmed Halîfe ve İsmail Halîfe ve sâir ebniye ve sukūf ahvâline ıttılâ‘ı olan bî-garaz Müslimîn huzûrunda keşif ve tahmîn-i sahîh ile tahmîn eyledikde masrûfum ancak on beş bin dört yüz altmış akçeye bâliğ olduğu icmâ‘ ve ittifâk olundukda ol mikdâr akçeyi bana teslîme vekîl-i mezbûr es-Seyyid Mehmed Efendi’ye kıbel-i şer‘den tenbîh olunmuşidi. El-hâletü hâzihî vekîl-i mezbûr es-Seyyid Mehmed Efendi meblağ-ı mezbûr on beş bin dört yüz altmış akçeyi bi’l-vekâle işbu meclis-i şer‘de bana tamamen ve kâmilen edâ ve teslîm ben dahi kabz ve tesellüm edip mâ‘adâ masrûfuma müte‘allik da‘vâdan müvekkil-i mezbûr Ahmed Bey’in zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîr fi’l-yevmi’t-tâsi‘ aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Ali Çavuş b. Abdullah, el-Hâc Mustafa b. İsmail el-müezzin, Mustafa b. Süleyman, Abdurrahman b. el-Hâc Mehmed, Mehmed b. Ali.