Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 185 Hüküm no: 118 Orijinal metin no: [11b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Halil’in nafaka davasının başkasıyla evlenmesi sebebiyle reddedildiği Ma‘rûz Medîne-i Üsküdar’da Arakıyeci el-Hâc Mehmed mahallesinde sâkine mu‘arrefetü’z-zât Safiye bt. Halil nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı Mahmud b. Hüseyin mahzarında zevc-i sâbıkım mezbûr Mahmud’un firâşından hâsıla ve benden mütevellide ve bi-hakkı’l-hıdâne hacr ü terbiyemde olan işbu hâzıratü bi’l-meclis kızım Emine nâm sagīrenin nafaka ve kisvesi’çün babası mezbûr üzerine külle yevm kıbel-i şer‘den üçer para nafaka farz ve takdîr olunup lâkin ben hîn-i takdîrde nefsimi sagīre-i mezbûreye ecnebî olan kimesneye tezvîc etmemle bu vechile hakk-ı hıdâne benden sâkıta olup mücerred kızım sagīre-i mezbûreyi babası mezbûr yedinden ahz etmemekle nafaka-i mefrûzasından târih-i i‘lâma gelince babası mezbûr zimmetinde müctemi‘a olan yetmiş bir buçuk guruşu taleb ederim deyü tasaddî eylediği da‘vâ-yı gayr-ı meşrû‘asına iltifât olunmadığı bi’l-iltimâs huzûr-ı âlîlerine i‘lâm olundu. Fî 2 min-Ş sene 1204