Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 185 Hüküm no: 119 Orijinal metin no: [11b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Hasan’ın, eşyalarını alıp kendisini dövüp küfür ve hakaretler ettikleri iddiasıyla Cafer Efendi b. Mustafa ile eşi Hatice bt. Musa’ya açtığı davayı ispat edemediği Ma‘rûz Medîne-i Üsküdar’da Kefçe mahallesinde sâkine mu‘arrefetü’z-zât Emetullah bt. Hasan nâm hatun medîne-i mezbûrede mahfil-i bâbda meclis-i şer‘-i hatîrde Cafer Efendi b. Mustafa ile zevcesi olup kezâlik zâtı mu‘arrefe Hadice bt. Musa nâm hatun muvâcehelerinde zevcân-ı mezbûrân târih-i i‘lâmdan altı ay mukaddem eşyâ-i memlûkemden mecmû‘-ı kıymetleri elli guruşa bâliğ on dört buçuk zirâ‘ bez ve otuz beş zirâ‘ ipeklimi mezbûre Hadice sandığım derûnundan hufyeten ahz eylediğinden mâ‘adâ zevci mezbûr Cafer Efendi dahi beni bi-gayrı hakkın yumruk ile darb eylediğinden gayri mûcib-i ta‘zîr olur elfâz-ı kabîha ile şetm etmekle mûcib-i şer‘îsini hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını isbâtdan ızhâr-ı acz edip talebiyle zevcân-ı mezbûrân Cafer Efendi ve Hadice Hatun’dan herbiri ba‘de’t-tahlîfi’ş-şer‘î mûcebiyle müdde‘iye-i mezbûre Emetullah da‘vâ-yı mezkûresiyle zevcân-ı mezbûrân Cafer Efendi ve Hadice Hatun’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-selhi Receb sene 1204