Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 186 Hüküm no: 121 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah b. İbrahim’in Ahmed b. İsmail’e olan borcunu Ahmed’den alacağı olan Çavuş Mehmed Ağa’ya ödemesi Ma‘rûz Medîne-i Üsküdar’da Kādıasker mahallesinde sâkin Ahmed b. İsmail medîne-i mezbûrede mahfil-i bâbda meclis-i şer‘-i hatîrde Feyzullah b. İbrahim mahzarında mezbûr Feyzullah târih-i i‘lâmdan üç sene mukaddem yedimden bi-tarîki’l-karz istidâne ve kabz ve umûruna sarfla istihlâk eylediği altmış guruş hakkımın otuz guruşunu bi’d-defa‘ât yedimden ahz ü kabz ve otuz guruşu zimmetinde bâkī kalmağla hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm otuz guruşun müdde‘î-i mezbûr Ahmed’e edâsıyla mezbûr Feyzullah şer‘an ilzâm olundukdan sonra müdde‘î-i mezbûr Ahmed’in hâzır bi’l-meclis Çavuş Mehmed Ağa nâm kimesneye ma‘lûmü’l-mikdâr deyni olmağla deyn-i mezkûrdan otuz guruş ile mezbûr Mehmed Ağa’yı işbu meclis-i şer‘de mezbûr Feyzullah üzerine havâle-i mukayyede ile havâle onlar dahi ber-vech-i muharrer havâleyi kabûl eyledikleri bi’l-iltimâs huzûr-ı âlîlerine i‘lâm olundu. Fî 3 min-Ş sene 1204