Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 187 Hüküm no: 123 Orijinal metin no: [12a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çengelköy’de bakkal ve simitçi esnafından bazılarının köy ahalileri ile aralarındaki vergi ödeme hususundaki anlaşmazlıklarında sulh oldukları Ma‘rûz Medîne-i Üsküdar’a tâbi‘ Çenger karyesinde Bakkāl Yorgi v. Yani ve Nikola v. Yani ve diğer Nikola v. Kosta ve Simidci Sayko v. Trandafil nâm zimmîler medîne-i mezbûrede mahfil-i bâbda meclis-i şer‘-i hatîrde yine karye-i mezbûre mütemekkinlerinden Kocabaşı Yorgi v. Apostol ve Sitil v. Hıristo ve Kosta v. Yamandi ve Yanaki v. Foço nâm zimmîler muvâcehelerinde ez kadîm bizler karye-i mezbûrede bakkāl ve simidci ve ekmekçi olup lâkin herbirimizi müstakil esnâf olduğumuza binâen mahmiye-i İslâmbol’da kethudâ ve ustalarımız ma‘rifetleriyle ordu-yı hümâyûn mesârifi ve sâir iktizâ eden tekâlifden hissemizi edâ edip karye-i mezbûre re‘âyâsı üzerlerine nâzile olan tekâlifden bizlerden hisse taleb olunmayıp ve verdiğimiz dahi yoğiken bu esnâda bizlerden dahi tekâlif taleb ve üzerimize mübâşir ta‘yîn etmeleriyle men‘ ü def‘ olunmak matlûbumuzdur deyü teşekkî onlar dahi cevâblarında ez kadîm esnâf-ı mezkûre sâir re‘âyâ ile ma‘an tekâlifden hisselerini edâ edegelmişlerdir deyü beynlerinde ba‘de vukū‘ı’l-münâza‘a beynlerine muslihûn tavassut edip fîmâ-ba‘d karye-i mezbûreye fermân-ı âlî ile nâzile olan tekâlifden esnâf-ı selâse üzere vasatü’l-hâl tekâlifi edâya ta‘ahhüd eylediklerinde onlar dahi sâir beynlerinde iktizâ eden mesârifden bir nesne taleb etmeyip ve fermân-ı âlî ile verecekleri tekâlifden dahi vasatdan ziyâde hisse taleb etmemek üzere herbiri mu‘âhede ve bu vechile beynleri ıslâh olunup kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 23 min-C sene 1204