Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 188 Hüküm no: 124 Orijinal metin no: [12a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Hasan’ın, kendisini darp edenlerden şikâyetçi olduğu ve darb edildiğini ispatladığı Ma‘rûz Medîne-i Üsküdar’a tâbi‘ Sarıgazi karyesi sâkinlerinden İbrahim b. Hasan nâm kimesne medîne-i mezbûrede mahfil-i bâbda meclis-i şer‘-i hatîrde karye-i mezbûre sâkinlerinden gāib ani’l-meclis Mehmed Emin b. Salih ve üvey oğlu Halil nâm kimesnelerden herbiri târih-i i‘lâmdan yedi gün mukaddem nacak ile başıma darb ve şec ve duhân çubuğu ile ağzıma ve omzumu darb ve hânek-i a‘lâsından dırs ta‘bîr olunur bir aded dişimin nısfını kesr ve omzuma kara bere etmeleriyle keşf ve mu‘âyene olunmak matlûbumdur dedikde cerrâh tâifesinden Ali Efendi ve sâir mazbûtü’l-esâmî Müslimîn ile mezbûr İbrahim’in a‘zâsına nazar olundukda fi’l-hakīka mezbûr İbrahim’in başı nacak yarasıyla meşcûc ve zikr olunan dişinin nısfı meksûr ve omuzu kara bere olduğu ba‘de’l-keşf ve’l-mu‘âyene vâki‘ hâl bi’l-iltimâs huzûr-ı âlîlerine i‘lâm olundu. Fî 13 min-Ş sene 1204