Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 188 Hüküm no: 125 Orijinal metin no: [12a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe ve kız kardeşi Zeynep’in yabancı erkekleri evlerine aldıkları ve Ayşe’nin kocası Mehmed’in de bu duruma göz yumduğundan mahalleden ihraç edilmeleri Ma‘rûz Medîne-i Üsküdar’da Hamzafakih mahallesi ahâlisinden İmâm Hafız Mehmed Efendi b. el-Hâc Mustafa ve Müezzin Molla Halil b. Ömer ve Abdurrahman b. İbrahim ve Salih Efendi b. Himmet ve el-Hâc Mustafa b. Musa ve el-Hâc Mahmud b. el-Hâc Mustafa ve es-Seyyid Selim b. Eyüb ve Mehmed b. Mehmed ve Eyüb b. el-Hâc İshak ve es-Seyyid Feyzullah b. Mehmed ve Ahmed b. el-Hâc Mustafa nâm kimesneler bi-ecma‘ihim medîne-i mezbûrede mahfil-i bâbda meclis-i şer‘-i hatîrde mahalle-i mezbûre sâkinelerinden hâzıratü bi’l-meclis Âişe bt. el-Hâc Bekir ile kız karındaşı Zeyneb bt. el-Hâc Bekir’in tarafından vekîli zevci Mehmed b. el-Hâc Ahmed muvâcehesinde mezbûretân Âişe ve Zeyneb kendi hâllerinde olmayıp nâ-mahremden dahi ictinâbları olmamağla dâimâ menzillerinde kendilere nâ-mahrem olan ricâl ile icrâ-yı fısk edip hattâ târih-i i‘lâm gecesi hâzıratü bi’l-meclis Gonca nâm Nasrâniye ile kendilere nâ-mahrem ve ecnebî olan mahmiye-i İslâmbol’dan iki nefer bostânîleri menzillerine da‘vet ve icrâ-yı fısk edip biz dahi zâbite ihbâr ve ahz esnâsında zikr olunan bostânîler firâr etmeleriyle merkūmândan bi’l-külliye emniyetimiz meslûb olmuşdur deyü sû’-i hâllerini muvâcehelerinde herbiri ihbâr ve fîmâ-ba‘d mezbûr Mehmed Ağa ile mezbûretân Âişe ve Zeyneb mahalle-i mezbûrede meks ve ikāmet etmeyip ihrâc olunmak bâbında fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 11 min-Ş sene 12040