Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 385 Hüküm no: 392 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ali Ağa’nın Aydos kazasındaki emlakını küçük çocuklarına hibe ettiği Medîne-i Aydos mahallâtından Varakagazi Mahallesi ahâlîsinden olup Mahmiye-i İstanbul’da müsâfiren sâkin el-Hâc Ali Ağa b. Mustafa nâm kimesne meclis-i şer‘-i şerîf-i enverde ikrâr ve takrîr-i kelâm edip mahalle-i mezbûrede bir tarafı Sarraf Hüseyin Çelebi mülkü ve bir tarafı Bağdâdzâde el-Hâc Hasan mülkü ve bir tarafı Aharyan <> Mustafa ve bir tarafı tarîk-i âm ile mahdûd bir bâb fevkānî yazlık oda ve sofa ve dört göz anbar ve bir kilâr ve tahtânî bir oda ve bir soba tâ‘bir olunur oda ma‘a sagīr hamam ve sakf-ı vâhide tahtında olan bir matbah ve kilâr ve fırın ve bi’r-i mâ ve eşcâr-ı müsmire ve gayr-ı müsmire bahçe ve havluyu müştemil dâhiliye tâ‘bir olunur menzil ile hâriciyye olan sakf-ı vâhidde iki aded tahtânî oda ve bir sofa ve bir ahır ve anbar ve samanhâne ve arpalık tâ‘bir olunur anbar [ve] kebîr öküz ahırı ve tahtânî altı aded hizmetkâr odaları ve bir anbar ve arpalık ve üç yüz vakıyye bakır evânî ve iki oda döşemesi ve iki aded pûşîde samanlık bahçe ve havlu ve harman yeri ve iki çift karasığır öküzü ve beş çift susığırı öküzleri ve âlât-ı çifti ve yirmi dört re’s hergele ve elli dört re’s karasığır ve yirmi bir re’s susığırı ve yüz elli aded sagīr ve kebîr ağnâmı ve yine kasaba-i mezbûrede câmi‘-i şerîf kurbünde <> ( ) Mahallesi’nde vâki‘ cereyân eden nehrin üzerinde dâir ma‘lûmü’l-hudûd ve bir bâb dolab değirmeni ve yine câmi‘-i şerîf kurbünde bir tarafı câmi‘-i şerîf ve bir tarafı el-Hâc Abdülbâki[‘nin] vakfeylediği dükkân ve tarafeyni tarîk-i âm ile mahdûd olan bir bâb iki kepenk berber dükkânı ve yine kazâ-i mezbûra tâbi‘ Eflihanlı nâm karyede vâki‘ ma‘lûmü’l-hudûd iki aded [90a] tahtânî odalar ve bir kilâr ve bir fırın ve bahçe ve hâriciyyesinde vâki‘ bir anbar ve bir köşk ve dört aded saz pûşîde hizmetkâr odaları ve saz pûşîde öküz ahırı [ve] harman yeri ve üç çift susığırı öküzü ve üç çift karasığır öküzü ve âlât-ı hırâseti cümle tevâbi‘ ve levâhıkı ile sagīr oğullarım olup medîne-i mezbûrede sâkin Osman ve Mehmed ile sagīre kızlarım Ümmügülsüm ve Ümmühani’ye târih-i kitâbdan dört ay mukaddem medîne-i mezbûrede hibe-i sahîh-i şer‘iyye ile hibe ve temlîk ve velâyeten kabz ve tesellüm eylemişidim. El-hâletü hâzihî emlâk ve akārât ve hayvânâtda alâka ve medhalim yokdur sagīrûn-ı mezbûrûnun mülk-i mevhûbeleridir dedikde hıfzan li’l-makāl bi’t-taleb ketb olundu. Fi’l-yevmi’s-sânî ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Şeyh Ali Efendi b. Mustafa, Mehmed Efendi b. Hüseyin, Çelebi Hüseyin Ağa b. Ahmed, Süleyman Ağa b. Za‘îm Mustafa, Ali Ağa b. Ahmed, Durali b. Mehmed.