Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 189 Hüküm no: 126 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Ağa b. Yusuf’un Osman b. Mustafa’ya açtığı alacak davasını ispat edemediği Ma‘rûz Medîne-i Üsküdar’da Hasanağa mahallesinde sâkin el-Hâc Mehmed Ağa b. Yusuf nâm kimesne medîne-i mezbûrede mahfil-i bâbda meclis-i şer‘-i hatîrde Osman b. Mustafa nâm kimesne mahzarında mezbûr Osman târih-i i‘lâmdan üç ay mukaddem Vilâyet-i Rumeli’nde Niş kazâsında cihet-i karz-ı şer‘îden yedimden ahz ve umûruna sarfla istihlâk eylediği kırk guruş zimmetinde hakkım olmağla meblağ-ı merkūm kırk guruşu hâlâ taleb ederim deyü da‘vâ ol dahi cevâbında meblağ-ı merkūm kırk guruş ahzını inkâr etmeğin müdde‘î-i mezbûr el-Hâc Mehmed Ağa ber-vech-i muharrer kırk guruş müdde‘âsını isbâtdan ızhâr-ı acz birle istihlâf etmeğin mezbûr Osman ba‘de’t-tahlîfi’ş-şer‘î mûcebiyle müdde‘î-i mezbûr el-Hâc Mehmed Ağa meblağ-ı merkūm kırk guruş mutâlebesiyle bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-selhi Receb sene 1204