Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 386 Hüküm no: 393 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Osman’ın evine hırsızlık için girdiğini iddia ettiği Kıptîlerle sulh olduğu Bâ-imzâ-i hazret-i efendi. Mahmiye-i İstanbul’da Sultan Mehmed Hân Gāzi hazretlerinin câmi‘-i şerîfleri civârında sâkine Malko bt. Ali ve Emine bt. Mustafa ve Salto bt. Ebûbekir ve İstîfa bt. Abdullah ve Hanım bt. Abdülmennan ve Sultan bt. Abdülmennan ve Vılko bt. Ali ve Aşye bt. Hüseyin ve Koko bt. Mustafa nâm Kıbtîler tarafından ber-vech-i âtî sulh ve ibrâyı ikrâra vekîl olduğu zât-ı mezbûrâtı bi’l-ma‘rifeti’ş-şer‘iyye ârifân Hüseyin b. Ali [ve] Mehmed b. Ahmed nâm kimesneler şehâdetleriyle şer‘an sâbit olan İbrahim Çeribaşı b. Ömer nâm Kıbtî meclis-i şer‘-i şerîf-i enverde mahmiye-i mezbûrede Pirinççi Sinan Mahallesi sâkinelerinden olup zâtı ta‘rîf-i şer‘î ile mu‘arrefe olan râfi‘atü’l-vesîka Emine Hatun bt. Osman mahzarında bi’l-vekâle ikrâr-ı tâm ve takrîr-i kelâm edip merkūme Emine Hatun bundan akdem mahalle-i mezbûrede vâki‘ menzilim açılıp yedimde olan işbu müfredât defteri mantûkunca mecmû‘u altı yüz guruş kıymetli eşyâm sirka olundu deyü müvekkilelerim merkūmâtı ahz u da‘vâ sadedinde oldukda beynlerine muslihûn tavassut edip merkūme Emine Hatun’u müvekkilelerim mezbûrât ile iki yüz guruş üzerine an-inkâr sulh eylediklerinde merkūme Emine Hatun dahi sulh-ı mezbûru kabûl ve bedel-i sulh olan meblağ-ı mezbûr iki yüz guruşu benim vesâtetimle ahz u kabz eyledikden sonra müvekkilelerim mezbûrât Malko ve Emine ve Âişe ve Salto ve Sultan ve İstîfa ve Hanım ve Koko Kıbtiyelerin zimmetlerini da‘vâ-yı mezkûresinden ibrâ ve iskāt etmeğle müvekkile-i mezbûrât Kıbtiyeler dahi bedel-i sulh deyü benim yedimle medfû‘ları olan iki yüz guruşa müte‘allika da‘vâdan mezbûre Emine Hatun’ın zimmetini ibrâ ve iskāt etmeleriyle ba‘de’l-yevm husûs-ı mezkûre müte‘allika her biri âhar ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetleri kalmadı dedikde merkūme Emine Hatun vekîl-i merkūm İbrahim Çeribaşı’yı cemî‘ kelimât-ı meşrûhasında bi’l-muvâcehe tahkīk ve bi’l-müşâfehe tasdîk etmeğin mâ-hüve’l-vâki‘ bi’t-taleb [-ketb] olundu. Fi’l-yevmi’l-hâmis aşere min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mumcu Mehmed Beşe b. Hüseyin, Câriyeci Ahmed Beşe b. Mustafa, Mehmed Beşe b. İbrahim, es-Seyyid el-Hâc Hasan [b.] es-Seyyid Ali, Mustafa b. Mehmed, Salih Çelebi b. ( ).