Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 197 Hüküm no: 143 Orijinal metin no: [13b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Yanaki’nin vefat eden Yorgi’deki alacağının ödenmesi talebiyle Yorgi’nin eşine açtığı davanın reddedildiği Ma‘rûz Mahmiye-i İslâmbol’da Bezzâzistân kurbünde Kürkçü Yanaki v. Hürmüz nâm zimmî medîne-i Üsküdar’da mahfil-i bâbda meclis-i şer‘-i hatîrde medîne-i mezbûreye tâbi‘ Çenger karyesinde mütemekkin iken bundan akdem hâlik olan Yorgi v. Tohari nâm zimmînin verâseti zevcesi Ezmerağda bt. Yamandi nâm Nasrâniye ile babası merkūm Tohari zimmîye ve sulbiye sagīre kızı Katrine’ye münhasıra olduğu tahakkukundan sonra kendi nefsinden asıl ve sagīre-i mezbûre Katrine’nin bâ-hüccet-i şer‘iye vasîyy-i mansûbesi olan şahsı mu‘arrefe zevce-i merkūme Ezmerağda muvâcehesinde hâlik-i merkūm Yorgi zimmînin hâl-i sıhhatinde gāib ani’l-meclis Simyon v. Kuzma nâm zimmîye cihet-i karzdan kırk sekiz guruş deynine tarafeynden bi’l-emr ve’l-kabûl kefîl ve dâmin oldukdan sonra kable’l-edâ merkūm Yorgi zimmî hâlik olup ben kefâletime binâen deyn-i merkūm kırk sekiz guruşu merkūm Simyon zimmîye edâ ve teslîm edip zevce-i mersûme Ezmerağda Nasrâniye dahi hâlik-i merkūmun terekesine vâzı‘atü’l-yed olmağla tereke-i hâlik-i merkūmdan bi’l-mürâca‘a taleb ederim deyü da‘vâ ve merkūme Ezmerağda Nasrâniye cevâbında deyn-i mezkûru ve müdde‘î-i merkūmun kefâletini ve hâlik-i merkūmun terekesine vaz‘-ı yedini bi’l-külliye inkâr etmeğin müdde‘î-i merkūm Yanaki zimmî deyn-i mezkûra kefâletini ve edâsını Polihron v. Petro ve Tanaş v. Yorgi nâm zimmîler şehâdetleriyle isbât etmeğin lâkin yemînden nükûl etmeğin mûcebiyle müdde‘î-i merkūm da‘vâ-yı mezkûresiyle merkūme Ezmerağda Nasrâniye’ye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî [21] min-Ş sene 1204