Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 198 Hüküm no: 144 Orijinal metin no: [13b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa’nın vefat eden Mehmed’de olan alacağının terekeden ödenmesi Ma‘rûz Medîne-i Üsküdar’da Mirâhor mahallesinde sâkin sâhib-i arzuhâl Ömer Ağa b. Ebûbekir nâm kimesne medîne-i Üsküdar’da mahfil-i bâbda meclis-i şer‘-i hatîrde arzuhâlde ismi mezkûr es-Seyyid Ahmed b. Mehmed nâm kimesne mahzarında mezbûr es-Seyyid Ahmed’in babası mezbûr Mehmed bin iki yüz dört senesi şehr-i Rebî‘ülâhir’in yirmi yedinci günü târihiyle müverrah bâ-temessük yedimden [ve] mâlımdan istikrâz ve kabz ve umûruna sarfla istihlâk eylediği altı yüz guruş hakkımı bana kable’l-edâ fevt olup oğlu mezbûr es-Seyyid Ahmed tereke-i vâfiyesine vâzı‘ü’l-yed olup hattâ ba‘de’l-vefât oğlu mezbûrdan taleb eylediğimde deyn-i mezkûru kabûl ve tereke-i vâfiyesine vaz‘-ı yedini ikrâr ve edâya dahi ta‘ahhüd etmekle hâlâ deyn-i meblağ-ı merkūm altı yüz guruşu müteveffâ-yı mezbûrun terekesinden olmak üzere mezbûr es-Seyyid Ahmed’den taleb ederim deyü da‘vâ ve mezbûr es-Seyyid Ahmed cevâbında fi’l-hakīka babası müteveffâ-yı mezbûrun müdde‘î-i mezbûr Ömer Ağa’ya cihet-i mezkûreden meblağ-ı merkūm altı yüz guruş deynini ve babası müteveffâ-yı mezbûrun tereke-i vâfiyesine vaz‘-ı yedini ve deyn-i mezkûru kabûl ettiğini ikrâr ü i‘tirâf etmeğin mûcebiyle deyn-i meblağ-ı merkūm altı yüz guruşun edâsıyla mezbûr es-Seyyid Ahmed şer‘an ilzâm olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 21 min-Ş sene 1204