Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 199 Hüküm no: 145 Orijinal metin no: [13b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapamacı Anton’a borcu olan Seyyid Ahmed’e borcunu ödemesi için tenbihatta bulunulduğu Ma‘rûz Mahmiye-i İslâmbol’da Bezzâzistân kurbünde kapamacı arzuhâl eden Anton v. Delvet nâm zimmî meclis-i şer‘-i hatîrde arzuhâlde ismi mezkûr es-Seyyid Ahmed b. es-Seyyid Abdullah nâm kimesne mahzarında mezbûr es-Seyyid Ahmed târih-i i‘lâmdan altı ay mukaddem aded ve fiyâtı beynimizde ma‘lûm kapama ve entari semenlerinden üç yüz yetmiş guruş hakkımın altmış beş guruşunu yedinden ahz ve istifâ ve üç yüz beş guruşu zimmetinde bâkī kalmağla taleb ederim deyü da‘vâ ve mezbûr es-Seyyid Ahmed cevâbında cihet-i mezkûreden müdde‘î-i mezbûra ol-mikdâr deynim olup lâkin müdde‘î-i merkūm deyn-i mezkûr ile gāibetü ani’l-meclis medyûnem Hadice Molla Kadın bt. Abdullah üzerine üçümüz bir mahâlde olduğumuz hâlde havâle-i mukayyede ile havâle eylediğimde herbirimiz havâleyi kabûl ve deyn-i mezkûrdan zimmetim berî olmuşdur deyü ba‘de’d-def‘ ve’l-inkâr mezbûr es-Seyyid Ahmed def‘-i mezkûrunu isbâtdan ızhâr-ı acz edip talebiyle müdde‘î-i merkūm Anton zimmî gıbbe’t-tahlîfi’ş-şer‘î mezbûr es-Seyyid Ahmed’in ikrârı mûcebince deyn-i bâkī-i merkūm üç yüz beş guruşu müdde‘î-i merkūma edâ ve teslîme mezbûr es-Seyyid Ahmed’e tenbîh olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 22 min-Ş sene 1204