Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 387 Hüküm no: 394 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Hüseyin’in Yorgancı Mehmed Çelebi’nin vakfettiği arsaya hasbi mütevellî tayin edildiği Mahmiye-i İstanbul’da el-Hâc Hamza Mahallesi’nde sâkin iken bundan akdem vefât eden merhûm Yorganî Mehmed Çelebi nâm sâhibü’l-hayrın atîkası Gülbûy bt. Abdullah’a ba‘dehâ evlâdına ba‘dehum evlâd-ı evlâdına ba‘dehum evlâd-ı evlâd-ı evlâdına ba‘de’l-inkırâz sulehâya [90b] tasarrufunu vakf ve şart eylediği mahalle-i mezbûrede vâki‘ bir tarafdan Gonca bt. Abdullah nâm hatun mülkü ve iki tarafdan Teberdâr Mehmed Efendi tasarrufunda olan vakıf bostan ve bir tarafdan tarîk-i âm ile mahdûd tûlen ve arzen bi-hesâb-ı terbî‘ iki yüz zirâ‘ muhterik menzil arsasının mütevellîsi olmamağla vakf-ı mezbûra kıbel-i şer‘den hasbî mütevellî nasb ve ta‘yîn olunmak lâzım ve mühim olmağın arsa-yı mezkûrenin ber-mûceb-i şart-ı vâkıf meşrûtalarından işbu bâ‘isetü’l-vesîka Ahmed b. Hüseyin her vechile tevliyet-i mezkûre uhdesinden gelmeğe kādir mahall ü müstahik idiği zeyl-i sahîfede mektûbü’l-esâmî Müslimîn haberleriyle müte‘ayyin [olmağın] vakf-ı mezbûra kıbel-i şer‘den mezbûr Ahmed ber-vech-i muharrer hasbî mütevellî nasb ve ta‘yîn olundukda ol dahi tevliyet-i mezkûreyi kabûl ve hizmet-i lâzimesin edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Efendi b. Yunus, Nurullah Çelebi b. Mustafa, Molla Ali b. Mahmud, Osman b. Ahmed.