Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 199 Hüküm no: 146 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Todori’nin, oğlu Todori’yi kandırıp livata yaptığı ve yanındaki iki kürk yakasını aldığı iddiasıyla Duvarcı Anderya’ya açtığı davayı ispat edemediği Ma‘rûz Medîne-i Üsküdar’a tâbi‘ Kuzguncuk karyesinde Panayot v. Todori nâm zimmî medîne-i mezbûrede mahfil-i bâbda meclis-i şer‘-i hatîrde Duvarcı Anderya v. Rali nâm zimmî muvâcehesinde merkūm Anderya zimmî târih-i i‘lâmdan yedi gün [mukaddem] sulbî oğlum işbu hâzır bi’l-meclis Todori nâm sagīri tahrîk ve i‘râ edip karye-i mezbûrede mütemekkin olduğu odasına fi‘l-i şenî‘ kasdıyla götürüp bir gece iskân ve livâta ettiğinden mâ‘adâ yedinde olan sekiz buçuk guruş kıymetli iki nâfe kürk yakasını bi-gayrı hakkın ahz etmekle mârrü’z-zikr kürk yakaları ile mûcibini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i [muharrer] müdde‘âsını isbâtdan âciz olup talebiyle merkūm Anderya zimmî gıbbe’t-tahlîfi’ş-şer‘î mûcebiyle müdde‘î-i merkūm Panayot zimmî da‘vâ-yı mezkûresiyle merkūm Anderya zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 17 min-Ş sene 1204