Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 200 Hüküm no: 147 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serasker Seyyid Hasan Paşa’nın bin kuruşunu Hüdai Şeyh Seyyid Aziz Mahmud Efendi Hankahı’na vakfettiği Ma‘rûz Bi-tevfîkihî te‘âlâ zikri âtî vakfın tescîl-i şer‘î ve teslîm ile’l-mütevellîye bâ‘is düstûr-ı mükerrem müşîr-i mufahham nâzımu menâzımü’l-ümem hâlâ serdâr-ı ekrem devletlü inâyetlü atûfetlü es-Seyyid Hasan Paşa neclü’l-merhûmi’l-mebrûr Çelebi Mehmed Ağa mâ-yürîd ve mâ yeşâ hazretleri taraf-ı bâhirü’ş-şereflerinden tevkîl buyurdukları medîne-i Üsküdar —humiyet ani’l-ekdârda— vâki‘ merhûm ve mağfûrun-leh kutbü’l-ârifîn sultânü’l-kâmilîn Hüdâî eş-Şeyh es-Seyyid Aziz Mahmud Efendi -kuddise sırruhû- hazretlerinin hânkāh-ı aliyyelerinde seccâde nişîn-i irşâd kerâmetlü eş-Şeyh Mehmed Rûşen Efendi medîne-i mezbûrede meclis-i şer‘-i şerîf-i Ahmedî ve mahfil-i dîn-i münîf-i Muhammedî’de li-ecli’t-tescîl mütevellî nasb olunan Hafız Ali Efendi b. el-Hâc Mustafa mahzarında müşârün-ileyh es-Seyyid Hasan Paşa hazretleri taraf-ı devletlerinden vekîl-i mûmâ-ileyhlerine irsâl ve zavâbıt-ı şurût ve kuyûdu vekîl-i mûmâ-ileyh re’yine tevkīf buyurdukları bin guruşu huzûr-ı Müslimînde tescîl-i şer‘î ve teslîm ile’l-mütevellî olundukda mütevellî-i mezbûr dahi meblağ-ı merkūmu vakfiyet üzere kabz ve tesellüm eylediğini ikrâr ü i‘tirâf ve derûnunda münderic şurût ve kuyûd-ı mazbûta ve âharı cihet-i müebbede ile mahtûm bir kıt‘a vakfiye tahrîr ve vekîl-i mûmâ-ileyh eş-Şeyh Mehmed Rûşen Efendi’nin taraflarına teslîm olunup makhûriyet-i düşman ve nîk-i tu‘me-i şimşîr ile mansûr ve muzaffer ve devâm-ı devletleri ed‘iyesine muvâzabetde olunduğu vekîl-i mûmâ-ileyh eş-Şeyh Rûşen Efendi’nin iltimâslarıyla huzûr-ı âlîlerine i‘lâm olundu. Fî 28 min-Ş sene 1204