Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 200 Hüküm no: 148 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim Ağa’nın, vakfettiği üç bin kuruş nakdi ile Üsküdar ve Yenişehir’deki emlakları vakfının mütevellisi Şerife Emetullah’ın görevinden alınıp yerine Haseki Mehmed Ağa’nın tayin edildiği Der-i devlet-mekîne arz-ı dâ‘î-i kemîne oldur ki: Medîne-i Üsküdar’da Ahmed Çelebi mahallesinde sâkin iken bundan akdem vefât eden el-Hâc İbrahim Ağa b. Ahmed nâm sâhibü’l-hayrın ber-mûceb-i vakfiye-i ma‘mûlün-bihâ hayatında nakden üç bin guruş ile emlâkinden mahalle-i mezbûrede vâki‘ bir bâb mülk menzilini ve yine medîne-i mezbûrede Karaca Bakkāl karşısında bir bâb attâr dükkânının ve Bursa Yenişehri’nde altı bâb dükkânlarını vakf-ı sahîh ile vakf ve yevmî beş akçe vazîfe ile tevliyetini evvelâ kendiye ba‘dehû zevcesi Rukiye bt. Ahmed nâm hatuna ba‘dehâ evlâdına ba‘dehû akreb-i akrabâsının eslah ve erşedine şart ve ta‘yîn ve zevce-i mezbûre Rukiye Hatun kendiden mukaddem vefât edip ve evlâdı dahi olmamağla müteveffâ-yı mezbûrun li-ebin kız karındaşı kızı Şerife Emetullah bt. Memiş nâm hatun akreb-i akrabâdan olmak üzere tevliyet-i mezkûreyi bâ-arz üzerine tevcîh ve berât ettirip lâkin müteveffâ-yı mezbûrun âhar li-ebin kız karındaşı oğlu Haseki Mehmed Ağa b. Ali nâm kimesne hîn-i tevcîhde diyâr-ı âharda bulunup mezbûre Şerife Emetullah inâsdan olup umûr-ı vakfı rü’yete iktidârı olmadığından mâ‘adâ tevliyet-i mezkûreye tasarrufu hilâf-ı şart-ı vâkıf olmağla hâlâ ben mezkûrdan ve müteveffâ-yı mezbûrun akreb ve akrabâsının eslah ve erşedi olduğuma binâen şart-ı vâkıf üzere tevliyet-i mezkûreyi taleb ederim deyü mezbûre Şerife Emetullah tarafından kāimmakām-ı mütevellîsi ve vekîl-i şer‘îsi sadrî kebîr oğlu el-Hâc Mustafa b. Mehmed Tâhir mahzarında da‘vâ ve kāimmakām-ı mezbûr dahi fi’l-hakīka tevliyet-i mezkûreyi vâlidesi müvekkile-i mezbûre Şerife Emetullah müteveffâ-yı mezbûrun akreb-i akrabâsından olmak üzere üzerine tevcîh ve berât ettirdiğini ve müdde‘î-i mezbûrun akreb-i akrabâdan olduğunu ikrâr lâkin [a]slah ve erşed olduğunu inkâr etmeğin mezbûr Haseki Mehmed Ağa müteveffâ-yı mezbûrun akreb-i akrabâsının aslah ve erşedi olup tevliyet umûrunda a‘lem ve her vechile umûr-ı vakfı rü’yete muktedir olduğunu mevsûku’l-kelim müderrisîn-i kirâmdan Mehmed Emin b. Mehmed ve kuzât-ı kirâmdan İbrahim Hıfzî Efendi [b.] Mehmed ve Hafız Mustafa Efendi b. el-Hâc Mehmed ve Ahmed Ağa b. İbrahim ve es-Seyyid Mustafa Efendi b. Mehmed ve Ömer Efendi b. Ali ve Abdi Ağa b. Hasan nâm kimesneler şehâdetleriyle ber-nehc-i şer‘î muvâcehesinde isbât etmeğin mûcebiyle tevliyet-i mezkûre mezbûre Şerife Emetullah’ın ref‘inden şart-ı vâkıf üzere işbu bâ‘is-i arz-ı ubûdiyet mezbûr Haseki Mehmed Ağa’ya tevcîh ve yedine berât-ı şerîf-i âlî-şân sadaka ve ihsân buyurulmak ricâsına bi’l-iltimâs pâye-i serîr-i a‘lâya arz olunur. Fî 27 min-Ş sene 1204 El-abdü’d-dâ‘î li’d-Devleti’l-aliyyeti’l-Osmâniye Derviş Mehmed el-Kādı-i bi-medîne-i Üsküdar