Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 202 Hüküm no: 150 Orijinal metin no: [14a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin’in çeşitli eşya ve tütün bedellerinden alacağı olduğu Seyyid Ömer ile yüz kuruş üzerine sulh oldukları Ma‘rûz Medîne-i Üsküdar’da Turbali mahallesinde sâkin es-Seyyid Hüseyin b. Mehmed medîne-i mezbûrede mahfil-i bâbda meclis-i şer‘-i hatîrde es-Seyyid Ömer b. Osman mahzarında târih-i i‘lâmdan bir buçuk sene mukaddem Vilâyet-i Anadolu’da Çerkeş kazâsında âhara bey‘ ve semenini bana îsâl ve teslîm için mezbûr es-Seyyid Ömer yedine îdâ‘ ve teslîm eylediğim kırk aded aba yağmurluk beheri üçer buçuk guruşdan yüz kırk guruş ve elli vakıyye duhân beher kıyyesi birer guruşdan elli guruş ve yine yedimden iştirâ eylediği kaput semeninden otuz üç guruş ki cem‘an iki yüz yirmi guruş hakkımın doksan iki guruşun yedinden ahz bâkī yüz yirmi sekiz guruşu zimmetinde kalmağla taleb ederim deyü tasaddî eylediği da‘vâsından bâ-tavassut-ı muslihîn yüz guruş bedel mukābelesinde mezbûr es-Seyyid Ömer ile sulh olup mâ‘adâsı olan yirmi sekiz guruşa müte‘allika âmme-i de‘âvîden mezbûr es-Seyyid Ömer’in zimmetini ibrâ ve ıskāt edip ol dahi ber-vech-i muharrer ibrâsını kabûl ve bedel-i sulh-ı merkūm yüz guruşu müdde‘î-i mezbûra edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî [27] min-Ş sene 1204