Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 387 Hüküm no: 395 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed b. el-Hâc Süleyman ile Serkiz v. Avanos’un alacak davasından sulh oldukları Mahmiye-i İstanbul’da Bıçakçılar Mahallesi ahâlîlerinden Keresteci el-Hâc Mehmed b. el-Hâc Süleyman nâm kimesne meclis-i şer‘-i hatîr-i lâzımü’t-tevkīrde neccâ[r] kalfalarından bâ‘isü’l-kitâb Serkiz v. Avanos nâm zimmî mahzarında ikrâr ve takrîr-i kelâm edip bin yüz otuz yedi senesi Ramazan-ı şerîfin yirmi yedinci günü bir husûsun temşiyyeti için dört yüz elli guruş bi-tarîkı’r-rüşve mesfûr Serkiz’e def‘ ve teslîm ol dahi yedimden ahz u kabz etmişidi deyü meblağ-ı mezbûru taleb ve da‘vâ ve müdde‘âmı şuhûd-ı udûl ile ba‘de’l-isbât beynimize muslihûn-ı Müslimûn tavassut edip da‘vâ-yı mezkûremden beni mesfûr Serkiz ile iki yüz yetmiş beş guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezkûr iki yüz yetmiş beş guruşu mesfûr Serkiz yedinden bi’t-tamam ahz u kabz e[tti]ğimden sonra husûs-ı mezkûra ve beynimizde ma‘lûm şirket ve târih-i kitâba gelince sâir cereyân eden ahz u i‘tâya müte‘allika âmme-i da‘vâdan ben mezbûr Serkiz’i ibrâ-i âm ile ibrâ ve iskāt eylediğimde ol dahi bedel-i sulh-ı mezkûra ve ber-vech-i muharrer târih-i kitâba gelince sâir beynimizde cereyân eden ahz u i‘tâya müte‘allika âmme-i de‘âvî ve mütâlebâtdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: El-hâcı Mustafa b. Murtaza, el-Hâc Süleyman b. el-Hâc Ali, Mustafa Ağa b. el-Hâc Mehmed kethüdâ-yı keresteciyân, es-Seyyid el-Hâc Mehmed b. Mehmed, es-Seyyid el-Hâc Ömer b. es-Seyyid el-Hâc Abdurrahman, es-Seyyid Abdullah Ağa b. es-Seyyid Mustafa, es-Seyyid el-Hâc Mehmed Ağa b. Ali, el-Hâc Mehmed Ağa b. el-Hâc Mustafa, el-Hâc Mustafa Ağa b. Mehmed, Mihverî Mehmed Çavuş Ağa b. Ali.