Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 206 Hüküm no: 159 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Süleyman’ın İhsaniye mahallesinde bulunan evdeki bir hissesini sattığı kardeşi Mehmed’in hisse bedelini Havva’ya ödemesi Ma‘rûz Medîne-i Üsküdar’da Debbâğlar mahallesinde sâkine mu‘arrefetü’z-zât Havva bt. Süleyman nâm hatun medîne-i mezbûrede mahfil-i bâbda meclis-i şer‘-i hatîrde li-ebin karındaşı Mehmed nâm kimesne mahzarında medîne-i mezbûrede İhsaniye mahallesinde vâki‘ ma‘lûmü’l-hudûd ve’l-müştemilât bir bâb vakıf menzil sekiz sehm i‘tibârıyla bir sehmi benim ve yedi sehmi ma‘lûmü’l-esâmî kimesnelerin olmağla ben menzil-i mezkûrda olan bir sehm hisse-i şâyi‘amı bundan akdem karındaşım mezbûr Mehmed’e elli guruş bedel mukābelesinde ve bedel-i merkūmu bana def‘ ü teslîm etmek şartıyla bâ-ma‘rifet-i mütevellî ferâğ ve tefvîz eylediğimde ol dahi tefevvüz ve kabûl edip lâkin bedel-i meblağ-ı merkūm elli guruşu bana edâ etmeyip hâlâ zimmetinde kalmağla hisse-i mezkûreyi red yâhûd bedel-i mezkûr teslîm olunmak matlûbumdur deyü da‘vâ ol dahi cevâbında fi’l-hakīka bir sehm hisse-i merkūmun bâ-ma‘rifet-i mütevellî şart-ı mezkûr ile elli guruş bedel mukābelesinde tefevvüzünü ve bedel-i mezkûr hâlâ zimmetinde olduğunu ikrâr ve bi’r-rızâ edâya ta‘ahhüd eylediği ba‘de’t-tescîl bi’l-iltimâs huzûr-ı âlîlerine i‘lâm olundu. Fî 24 min-Ş sene 1204