Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 388 Hüküm no: 396 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tefen’e tâbi Kurukavak köyü ahalisi ile eski Bolu voyvodası olan Yusuf Ağa’nın aralarındaki alacak davasında sulh oldukları Bâ-imzâ-i hazret-i efendi. Vilâyet-i Anadolu’da Tefenni kazâsına tâbi‘ Kurukavak karyesi ahâlîsinden olup Mahmiye-i İstanbul’da müsâfiren sâkin Hüseyin b. İbrahim ve Halil b. Hasan ve Hüseyin b. Osman ve Mahmud b. Hızır ve Eyüb b. Mehmed, ve Hızır b. Ahmed ve Mahmud b. Durmuş ve Salih b. Satılmış ve İbrahim b. Şa‘ban ve Süleyman b. Şa‘ban ve Yusuf b. Hızır ve İbrahim b. Süleyman ve Ahmed b. Hasan nâm kimesneler meclis-i şer‘-i şerîf-i enverde sâbıkā Bolu voyvodası Yusuf Ağa b. Ahmed Ağa mahzarında her bir ikrâr ve takrîr-i kelâm edip merkūm Yusuf Ağa bundan akdem beldâr akçesi ve teftîş nâmıyla ve katır akçesi nâmıyla bi-gayr-ı hakkın bizden bin yüz guruş almışidi deyü da‘vâ eylediğimizde ol dahi inkâr etmekle beynimizde münâza‘ât-ı kesîre ve muhâsamât-ı [91a] şedîde ivka‘a [vâkı‘a] olmuş idi el-hâletü hâzihî beynimize muslihûn tavassut edip da‘vâ-yı mezkûremizden merkūm Yusuf Ağa ile bizi üç yüz guruş üzerine inşâ-i akd-i sulh ettiklerinde biz dahi sulh-ı mezbûru kabûl ve bedel-i sulh olan meblağ-ı mezbûr üç yüz guruşu yedinden her birimiz tamamen ve kâmilen ahz u kabz edip husûs-ı mezbûra müte‘allika da‘vâdan mezbûr Yusuf Ağa’nın zimmetini ibrâ ve iskāt edip ol dahi bedel-i sulh deyü bize medfû‘u olan üç yüz guruşa müte‘allika da‘vâdan zimmetimizi ibrâ ve iskāt etmekle husûs-ı mezbûra müte‘allika kat‘â da‘vâ ve nizâ‘ ve husûmetimiz kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Ağa b. el-Hâc Ömer Efendi, es-Seyyid Ebûbekir Çelebi b. es-Seyyid Ali, Molla Mustafa b. Osman, Ahmed Ağa b. Osman Ağa, Süleyman Ağa b. Mustafa Efendi, es-Seyyid İsmail b. es-Seyyid Mustafa, Müftîzâde Mustafa Efendi b. Ahmed Efendi, Ömer Odabaşı b. İsmail, Veli Odabaşı b. Mustafa.