Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 209 Hüküm no: 167 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marnos bt. Bağdasar’a borçlu olan Kıpti Mehmed’in borcunu ödemesi Ma‘rûz Medîne-i Üsküdar’da Yenimahalle’de mütemekkine ve şahsı mu‘arrefe Marnos bt. Bağdasar nâm Nasrâniye medîne-i mezbûrede mahfil-i bâbda meclis-i şer‘-i hatîrde Mehmed b. Mehmed nâm Kıbtî mahzarında mezbûr Mehmed bundan akdem emlâki[m]den iki şalvar ve bir biniş ve bir sûzenî entari ve iki bürüncek gömlek ve üç yağlık ve bir duhân kesesi ve yirmi beş zirâ‘ bez ve iki mak‘ad ve bir makramasını rehn vaz‘ ile yedimden istikrâz ve kabz ve umûruna sarfla istihlâk eylediği altmış guruş hakkımı taleb ederim deyü da‘vâ ve mezbûr Mehmed cevâbında müdde‘î-i [müdde‘iye-i] merkūme[ye] cihet-i mezkûreden ol-mikdâr deyni olduğunu ikrâr lâkin meblağ-ı merkūm altmış guruşu için müdde‘î-i [müdde‘iye-i] merkūme[ye] beher şehr altmışar paradan beş sene bilâ-devr-i şer‘î murâbaha olmak üzere medfû‘um olan doksan guruşun altmış guruşunu deyn-i mezkûra mahsûb ve mâ‘adâ otuz guruşunu istirdâd ederim deyü def‘e tasaddî ve müdde‘iye-i merkūme dahi ber-vech-i muharrer murâbaha olmak üzere ancak üç guruş kabzını ikrâr ve ziyâde müdde‘âsını inkâr etmeğin mezbûr Mehmed ziyâde müdde‘âsını isbât edemeyip talebiyle müdde‘iye-i mezbûre gıbbe’t-tahlîfi’ş-şer‘î mûcebiyle müdde‘iye-i mezbûre kabzını mu‘terife olduğunu üç guruş murâbahayı deyn-i mezkûr altmış guruşun üç guruşuna ba‘de’l-mahsûb bâkī kalan elli yedi guruşu müdde‘iye-i merkūmeye edâ ve teslîme mezbûr Mehmed’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 17 min-N sene 1204