Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 210 Hüküm no: 169 Orijinal metin no: [15b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’ın Aşcıbaşı mahallesi ahalisinin, kendilerine sürekli hakaret ve küfredip tehdit eden Seyyid Mehmed ile hanımı Hafize’nin mahallerinden ihraç edilmeleri talepleri Ma‘rûz Medîne-i Üsküdar’da Aşcıbaşı mahallesi sükkânından İmâm Hafız Salih Efendi b. Mehmed ve ahâlisinden el-Hâc Ali b. Hüseyin ve Mustafa Ağa b. Mehmed ve Ali Beşe b. Mehmed ve Ahmed Beşe b. Mehmed ve Mustafa b. Ahmed ve Mehmed b. Hüseyin ve Halil Ağa b. Mehmed ve Salih b. Ahmed ve Salih b. Süleyman ve Abdulkadir Beşe b. Yusuf nâm kimesneler meclis-i şer‘-i hatîrde es-Seyyid Mehmed b. Hasan nâm kimesne ile zevcesi mu‘arrefetü’z-zât Hafize bt. Abdullah nâm hatun mahzarlarında mezbûrân es-Seyyid Mehmed ve Hafize kendi hâllerinde ırzlarıyla mukayyed olmayıp hadîdü’l-lisân olmalarıyla zevcân-ı mezbûrân dâimâ mûcib-i ta‘zîr olur elfâz ile herbirimize şetm ve ırzımızı hetk eylediklerinden gayri mahallenizi ihrâk bi’n-nâr ederiz deyü bizleri ihâfe ve ta‘cîz ve tekdîrden hâlî olmayıp kendilerden bi’l-külliye emniyetimiz meslûb olmağla fîmâ-ba‘d zevcân-ı mezbûrân mahalle-i mezbûreden ihrâc olunmak matlûbumuzdur deyü ahâli-i mezbûrûndan herbiri zevcân-ı mezbûrânın sû’-i hâllerini muvâcehesinde ihbâr ve mahalle-i mezbûreden ihrâclarını istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 29 min-N sene 1204