Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 212 Hüküm no: 173 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ali’nin, Edirne ve Karamürsel’deki zeametinde yaptığı yazıcılık hizmeti bedelinin ödenmesi talebiyle Hasan Ağa’ya açtığı davada sulh olduğu Ma‘rûz Mevâdd-ı şer‘iye istimâ‘ı’çün kıbel-i şer‘den meb‘ûs Mustafa Efendi dâ‘îleri medîne-i Üsküdar’a tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûre sükkânında sâhib-i arzuhâl Mustafa b. Ali meclis-i ma‘kūd-ı mezkûrda arzuhâlde ismi mezkûr Hasan Ağa b. Murtaza nâm kimesne mahzarında ben ücret ile hizmet eder makūlesinden olup mezbûr Hasan Ağa’nın talebiyle işbu târih-i i‘lâma gelince yirmi üç ay Vilâyet-i Rumeli’nde Edirne’de ve medîne-i mezbûre nevâhîsinden Karamürsel kazâsında iltizâmen mutasarrıf olduğu karyelerde yazıcılık hizmetinde olmamla şühûr-ı mezkûrede sebkat eden hizmetimin ecr-i mislini taleb ederim deyü eylediği da‘vâsından bâ-tavassut-ı muslihîn yirmi guruş bedel-i makbûz mukābelesinde mezbûr Hasan Ağa ile sulh olup ziyâde ecr-i misline ve bi’l-cümle husûs-ı mezkûra müte‘allıka âmme-i de‘âvîden mezbûr Hasan Ağa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî 25 min-Ş sene 1204