|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 251 Hüküm no: 350 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
İbrahim Beşe’nin alacağı olduğunu ispatlayamadığı
Tüccâr tâifesinden İbrahim Beşe b. Musa mahfil-i kazâda işbu sâhibü’l-kitâb Yusuf Beşe b. Abdullah muvâcehesinde üzerine da‘vâ ve takrîr-i kelâm edip mezbûr Yusuf Beşe zimmetinde beynimizde ma‘lûm müşterâ ve makbûz olan esîr bahâsından yüz bir kıt‘a riyâlî guruş hakkım olup meblağ-ı mezbûrdan altı guruşunu ahz u kabz edip bâkī doksan beş guruş hakkımı taleb eylediğimde vermede ta‘allül ve muhâlefet etmeğin suâl olunup alıverilmesi murâdımdır dedikde gıbbe’s-suâl mezbûr Yusuf Beşe muvâcehesinde fi’l-hakīka kaziyye vech-i muharrer üzere olup müdde‘î-i mezbûra esîr bahâsından bâkī doksan beş guruş deynim olup lâkin bi’t-tamam edâ ve îfâ eyledim deyü da‘vâyı def‘ eyledikde gıbbe’l-inkâr ve’l-istişhâd mezbûr Yusuf ityân-ı beyyineden ızhâr-ı acz ve istihlâf eyledikde müdde‘î-i mezbûr İbrahim Beşe’ye vech-i muharrer üzere bâkī doksan beş guruşu tamamen ahz ve istîfâ eylemediğine yemîn teklîf olundukda nükûl etmeğin mûcebiyle bilâ-vech da‘vâdan mezbûr İbrahim Beşe men‘ olunup mâ-vaka‘a bi’t-taleb ketb olundu.
Fi’l-hâdî aşer min-Cemâziyelâhire li-sene erba‘a ve sittin ve elf.
Şuhûdü’l-hâl: Ali Beşe b. Abdullah çukadâr, Pîrî Beşe b. Hüseyin, İbrahim Çelebi b. Davud, Rıdvan b. Abdullah, Mehmed Beşe b. Abdullah ve gayruhum.
|