Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 213 Hüküm no: 176 Orijinal metin no: [16a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın Hüdai Şeyh Mahmud Efendi Vakfı’ndan istiğlal yoluyla aldığı borcu vakfa ödemesi Ma‘rûz Medîne-i Üsküdar’da vâki‘ kutbü’l-ârifîn gavsü’l-vâsılîn Hüdâî es-Seyyid eş-Şeyh Mahmud Efendi Vakfı’nın kāimmakām-ı mütevellîsi Hafız Ali Efendi b. el-Hâc Mustafa tarafından ber-vech-i âtî vekîl-i müseccel-i şer‘îsi Molla Mustafa b. Hasan medîne-i mezbûrede mahfil-i bâbda meclis-i şer‘-i hatîrde zâtı vech-i şer‘î üzere mu‘arrefe olan Hadice bt. Abdullah nâm hatun mahzarında mezbûre Hadice Hatun medîne-i mezbûrede Sinanpaşa mahallesinde vâki‘ ma‘lûmü’l-hudûd ve’l-müştemilât bir bâb mülk menzilini bin iki yüz bir senesi Zilka‘de’sinin beşinci günü târihiyle müverrah bir kıt‘a istiğlâl hücceti mantûkunca müvekkilem mezbûr Ali Efendi yedinden mâl-ı vakf-ı mezbûrdan olmak üzere istidâne ve kabz ve umûruna sarfla istihlâk eylediği cihet-i karzdan üç yüz guruş deyni mukābelesinde menzil-i mezbûru bi-tarîki’l-istiğlâl müvekkilim mezbûra bey‘ ve teslîm ve ba‘de’t-tahliye ve’t-takābuz müvekkilim mezbûr mezbûre Hadice Hatun’a beher sene kırk beşer guruşa îcâr ve teslîm ol dahi ba‘de’l-istîcâr ve’t-tesellüm ve’l-kabûl menzil-i mezkûr ücretinden bâkī yüz on guruşun on bir guruşunu yedinden ahz ve doksan dokuz guruşu zimmetinde kalmağla menzil-i mezkûru ba‘de’l-fekk asl-ı mâl-ı merkūm üç yüz guruş ile ücret-i merkūmeden doksan dokuz guruş ki cem‘an üç yüz doksan dokuz guruşu vakf-ı mezbûr için bi’l-vekâle taleb ederim deyü da‘vâ ettikde ol dahi cevâbında ber-vech-i muharrer ikrâr ü i‘tirâf etmeğin mûcebiyle meblağ-ı merkūm üç yüz doksan dokuz guruşu müvekkil-i mezbûra vakf-ı mezbûr için edâ ve teslîme mezbûre Hadice Hatun’a ve menzil-i mezkûru fekke vekîl-i mezbûrdan herbirine tenbîh olunduğu bi’l-iltimâs huzûr-ı âlîlerine i‘lâm olundu. Fî 21 min-Ş sene 1204