Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 220 Hüküm no: 189 Orijinal metin no: [17a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Hasan’ın satın aldığı çeşitli kahvehane eşyalarını satış feshedildiğinden iade etmesi Ma‘rûz Medîne-i Üsküdar’da Demirciler Sûku’nda sâkin Kahveci Hasan b. Mehmed medîne-i mezbûrede mahfil-i bâbda meclis-i şer‘-i hatîrde diğer Hasan b. Mustafa mahzarında mezbûr diğer Hasan târih-i i‘lâmdan iki ay mukaddem sâlifü’z-zikr Demirciler Sûku’nda vâki‘ bir bâb kahve dükkânı derûnunda mevcûd yedinde mâlı olan bir bakır mangal ve şerbet ibriği ve bir kahve ibriği ve on fincan ve bir çekmece ve bir dolab ve iki nargile ve dört yasdık ve üç beylik ve beş çubuk bana gedik olmak şartıyla yetmiş beş guruşun [guruşa] bey‘ ve teslîm ben dahi şart-ı mezkûr ile iştirâ ve kabûl ve meblağ-ı merkūm yetmiş guruşun altmış guruşu mezbûr diğer Hasan yedine def‘ ü teslîm etmiş idim el-hâletü hâzihî şart-ı mezkûr ile akdin fesâdına binâen eşyâ-i muharrere-i mezkûreyi yedimden ahz ve medfû‘um olan meblağ-ı merkūm altmış guruşu bana redd ü teslîme mezbûr diğer Hasan’a tenbîh olunmak matlûbumdur deyü da‘vâ ve mezbûr diğer Hasan cevâbında husûs-ı mezkûru ikrâr ü i‘tirâf etmeğin mûcebince eşyâ-i muharrere-i mezkûreyi mezbûr diğer Hasan’a def‘ ü teslîm birle ve mezbûr diğer Hasan dahi meblağ-ı merkūm altmış guruşu müdde‘î-i mezbûr Kahveci Hasan’a redd ü teslîme mezbûr diğer Hasan’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 7 min-L sene 1204