Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 390 Hüküm no: 398 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofya eski kadısı Abdurrahman Efendi’nin İstefan kazasındaki evini ve tarlalarını Süleyman Çelebi b. Mehmed’e sattığı Mahmiye-i İstanbul’da Sancakdâr Hayreddin Mahallesi’nde sâkin sâbıkā Sofya kādısı olan umdetü’l-mevâliyyi’l-izâm Abdurrahman Efendi b. el-merhûm Mehmed Efendi hazretleri tarafından husûs-ı âti’l-beyâna vekîl olup Ali Odabaşı b. Mehmed ve Osman Odabaşı b. Mehmed şehâdetleriyle sâbit ve sübût-ı vekâletine hükm-i şer‘î lâhık olan el-Hâc Mehmed b. Yahya meclis-i şer‘-i hatîr-i lâzımü’t-tevkīrde işbu bâ‘isetü’l-vesîka Süleyman Çelebi b. Mehmed mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkil-i mezbûrun yedinde mülk ve hakkı olup vilâyet-i Anadolu’da İstefan kazâsına tâbi‘ Fiye [Fariye] nâm karyede vâki‘ bir tarafdan Ca‘fer menzili ve bir tarafdan Halil menzili ve bir tarafdan el-Hâc Mehmed menzili ve bir tarafdan tarîk-i âm ile mahdûd <> iki bâb fevkānî oda ve bir anbâ[r] ve samanhâne ve kenîf ve bir mikdâr bahçeyi müştemil mülk menzilini cemî‘ tevâbi‘ ve levâhıkı ve kâffe-i hukūk ve merâfıkı ile tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mezbûr Süleyman Çelebi’ye on guruşa bey‘ ve temlîk ve karye-i mezkûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd bir kıt‘a tarla ve kazâ-i mezkûra tâbi‘ Terze nâm karye sınırı dâhilinde vâki‘ kezâlik inde’l-ahâlî ve’l-cîrân ma‘lûmü’l-hudûd bir kıt‘a tarlasını mezbûr Süleyman Çelebi’ye bi-safkatin vâhidetin otuz altı guruş bedel mukābelesinde bâ-ma‘rifet-i sâhib-i arz ferağ ve tefvîz ve her birini mahallinde kabz ve tesellüm ve tasarrufa taslît eylediğinde ol dahi ber-vech-i muharrer iştirâ ve temellük ve tefevvüz ve kabûl eylediğinden sonra semen-i mezbûr ile bedel-i merkūm cem‘an kırk altı guruşu yedinden tamamen ahz u kabz eyledi min-ba‘d zikrolunan menzil-i mezbûr Süleyman Çelebi’nin mülkü ve tarlalar hakk-ı tefevvüzü olup müvekkil-i mûmâ-ileyhin kat‘â alâka ve medhali kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mustafa Beşe b. Mahmud, Mehmed Çelebi b. Mustafa, Hamza Çelebi b. Hüseyin, Osman Odabaşı b. ( ), Mehmed Efendi b. Ahmed.