Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 391 Hüküm no: 399 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şark seferinde şehid olan Mustafa Ağa’nın veresesi ile seferde yanında yoldaşı olan Katana Mehmed Ağa’nın birbirlerinin zimmetlerini ibra ettikleri Vilâyet-i Anadolu’da Şarkipare kazâsı ahâlîsinden iken bundan akdem diyâr-ı Acem’de şehîden vefât eden Mustafa Ağa b. el-Hâc İbrahim’in verâseti zevcesi Âişe Hatun bt. Ahmed b. Abdullah ile sulbî kebîr oğulları Mehmed ve Ahmed ve Salih ve Ebûbekir ve Halil’e münhasıra olduğu şer‘an zâhir ve müte‘ayyin oldukdan sonra mezbûre Âişe Hatun ile mezbûrûn Mehmed ve Ahmed ve Salih ve Ebûbekir ve Halil taraf[ın]dan husûs-ı âti’l-beyâna vekîl olduğu yedinde olan vekâlet hücceti mantûkunca Mehmed b. Veli ve Osman b. Şa‘ban nâm kimesneler [92a] şehâdetleri ile mahzar-ı hasımda şer‘an sâbit olan müteveffâ-i merkūmun karındaşı ve mezbûrûn Mehmed ve Ahmed ve Salih ve Ebûbekir ve Halil’in ammileri Ömer Ağa b. el-mezbûr el-Hâc İbrahim meclis-i şer‘-i şerîf-i enverde müteveffâ-i mezbûrun yanında mevcûd bulunan terekesini kabz ve ve[re]se-i mezbûrûnuna îsâle yedinde olan hüccet mantûkunca vasiyy-i muhtârı olmağla terekesine bi’l-vesâye vâzı‘u’l-yed olan râfi‘u’l-kitâb Katana Mehmed Ağa b. Ömer nâm kimesne mahzarında bi’l-vekâle ikrâr ve takrîr-i kelâm edip mezbûr Katana Mehmed Ağa müteveffâ-i mezbûrun diyâr-ı Acem’de şerîki olmağla bi-emri’llâhi te‘âlâ vefât eylediğinde dahi yanında mevcûd bulunan terekesini verese-i mezbûrûnuna îsâle vasiyy-i muhtâr nasb ve ta‘yîn ve ihtiyâr ve memûr olduğu muhârebeye azîmet ve musırran alâ-îsâ’ihî ma‘rekede şehîden vefât etmekle mezbûr Katana Mehmed Ağa yanında mevcûd bulunan terekesinden bir re’s câriye ve bir köle ve bir sansar kürk ve sim iki hançer ve iki bıçak ve bir kalkan ve bir çift piştov tâ‘bir olunur tüfenk ve bir sim kılıç ve bir karakılıç ve iki siyah poşusunu bi’l-vesâye ahz u kabz ve mahall-i mezbûrede vekâlet-i mahkiyem hasebiyle bana teslîm ben dahi yedinden bi’l-vekâle ahz u kabz ve tesellüm edip müteveffâ-i mezbûrun gerek diyâr-ı Acem’de ve gerek İstanbul’da ve sâir mahallerde bulunan zimmetlerden mâ‘adâ eşyâya ve nukūda müte‘allika da‘vâdan mezbûr Katana Mehmed Ağa’nın zimmetini bi’l-vekâle ibrâ ve iskāt eyledim ba‘de’l-yevm müvekkillerim mezbûrûn benim vekâletimi inkâr edip mezbûr Katana Mehmed Ağa’dan nesne ahz u kabz ederler ise mâl-ı me’hûzuna ben zâmin ve kefîl oldum dedikde merkūm Mehmed Ağa dahi ibrâ-yı mezbûru kabûl edip ber-vech-i mübeyyin zimemde olan mâl-ı şirketimizden mâ‘adâ da‘vâdan verese-i mezbûrûnun zimmetlerin ben dahi ibrâ ve iskāt eyledim dedikde mâ-vaka‘a bi’t-taleb ketb olundu. Bâ-imzâ-i hazret-i efendi. Fi’l-yevmi’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mataracızâde İbrahim Odabaşı 67 [bölü]k, Abdurrahman Odabaşı b. Şa‘ban 99 [bölü]k, el-Hâc Ebûbekir b. Süleyman ( ) [bölü]k, Salih Çelebi b. Süleyman, Küçük Mehmed 67 c[emâ‘at], Küçük es-Seyyid İsmail 67 c[emâ‘at], Bayrakdâr Ali Ağa 71 c[emâ‘at], Ali Odabaşı 17 c[emâ‘at], Hasan Beşe b. Abdullah 67 [bölü]k