Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 225 Hüküm no: 198 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Mehmed’in, Şerife Emine’deki alacağının ödenmesi için mühlet verdiği Ma‘rûz Mahmiye-i İslâmbol’da Davudpaşa İskelesi’nde sâkin Osman b. Mehmed medîne-i Üsküdar’da mahfil-i bâbda meclis-i şer‘-i hatîrde Şerife Emine bt. Ahmed nâm hatun tarafından ber-vech-i âtî vekîl olduğu zâtını ârifân Mustafa Efendi b. Hasan ve Osman b. İbrahim nâm kimesneler şehâdetleriyle sâbit olan es-Seyyid Ahmed Efendi b. Numan mahzarında müvekkile-i mezbûre târih-i i‘lâmdan iki sene mukaddem yedimden iktirâz ve kabz ve umûruna sarfla istihlâk eylediği yüz yetmiş üç guruş zimmetinde hakkım olmağla taleb ederim deyü da‘vâ ve vekîl-i mezbûr dahi müvekkilesi mezbûre Şerife Emine’nin müdde‘î-i mezbûra ber-vech-i muharrer yüz yetmiş üç guruş deyni olduğunu ikrâr ü i‘tirâf edip lâkin def‘aten edâya iktidârı olmayıp istimhâl etmeğin müdde‘î-i mezbûr dahi ber-vech-i muharrer meblağ-ı merkūm yüz yetmiş üç guruşun yüz guruşunu târih-i i‘lâmdan on beş gün tamamında ve yetmiş üç guruşunu dahi altmış bir gün tamamında edâ etmek üzere müvekkile-i mezbûre Şerife Emine Hatun’u rızâsıyla imhâl eyledikde ol dahi müddet-i mezkûre tamamında edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 24 min-Şa‘bân sene 1204