Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 226 Hüküm no: 200 Orijinal metin no: [18a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Sadullah ve Seyyid Mehmed Haşim kardeşlerin tarlalarını kiraya verdikleri Ali b. Osman ile kira feshi davasında sulh oldukları Ma‘rûz Medîne-i İslâmbol’da Davudpaşa mahallesi sükkânından sâhib-i arzuhâl es-Seyyid Mehmed Sadullah ve es-Seyyid Mehmed Haşim ibney es-Seyyid Mehmed nâm karındaşlar medîne-i Üsküdar’da mahfil-i bâbda meclis-i şer‘-i hatîrde derûn-ı arzuhâlde ismi mezkûr Ali b. Osman muvâcehesinde ale’l-iştirâki’s-seviyy taht-ı tasarrufumuzda olup medîne-i mezbûreye tâbi‘ Nerdubânlı karyesinde vâki‘ lede’l-ahâli ve’l-cîrân ma‘lûmü’l-hudûd otuz beş kıt‘a tarlalarımızı bin iki yüz üç senesi otuz guruş ücret kavliyle mezbûr Ali istîcâr ve bir mikdârını kendi zirâ‘at edip mâ‘adâsını âhara îcâr ve ücretini kabz eyledikden sonra işbu sene dahi yine otuz guruş ücret ile istîcâr ve ücretini bize teslîm edip lâkin biz îcârımıza nâdim olduğumuza binâen fesh-i icâre birle makbûzumuz olan ücret-i mezkûreyi kendiye redd ü teslîm etmiş iken yine mezbûr Ali fuzûlî tarlalarımızın bir mikdârını kendi zirâ‘at ve mâ‘adâsını âhara îcâr etmekle kasr-ı yedine tenbîh olunmak matlûbumuzdur deyü da‘vâ ve mezbûr Ali cevâbında zikr olunan tarlaları bin iki yüz üç senesinden bin iki yüz beş senesine gelince üç seneliğini doksan guruşa bana îcâr etmişler idi deyü ber-vech-i muharrer fesh-i icâre eylediğini inkâr ve beynlerinde münâza‘ât-ı kesîre vâkı‘a olmuş idi el-hâletü hâzihî müdde‘iyân-ı mezbûrân mezbûr Ali’ye mukaddemâ redd ü teslîm eyledikleri otuz guruşdan mâ‘adâ bi-tarîki’s-sulh otuz guruş dahi def‘ ü teslîm ve kendinin zirâ‘at eylediği tarlaların ücretinden fâriğ ve hâlâ nadas eylediği tarlaları sene-i âtîyede ücretiyle zirâ‘ate bi’r-rızâ ruhsat verdikde mezbûr Ali dahi kabûl ve âhara îcâr eylediği tarlalardan keff-i yed edip bu vechile kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 22 min-L sene 1204